Bir jylda kúnbaǵys maıy 20% qymbattady
2022 jylǵy 24 maýsym 11:57

Bir jylda kúnbaǵys maıy 20% qymbattady

NUR-SULTAN. QazAqparat – Qazaqstan kúnbaǵys maıyn eksporttaýshy el bolǵanyna qaramastan, onyń baǵasy bir jylda 20% qymbattaǵan. Bul jaıynda QazAqparat Energyprom.kz saıtyna silteme jasap habarlaıdy.

Saıttaǵy málimet boıynsha, 2022 jyldyń qańtar-mamar aralyǵynda 197,3 myń tonna kúnbaǵys maıy óndirilgen. Bul byltyrǵydan 29,6% kóp. Al tazartylmaǵan kúnbaǵys maıyny óndirisi bir jyl burynǵy kórsetkishten 61,3% artyq bolǵan. Al tazartylǵan ónimniń óndirisi byltyrǵydan 6,9% az.

«Tazartylmastan satylatyn kúnbaǵys maıynyń 78%-yn Shyǵys Qazaqstan óńiri berip tur. Al tazartylǵan kúnbaǵys maıynyń 78%yn Shyǵys Qazaqstan oblysy (28,7 myń tonna) men Shymkent qalasy (22,6 myń tonna) bergen.

Aýyl sharýashylyǵy mınıstrligi Qazaqstan aýmaǵynan kúnbaǵys maıyn alyp shyǵýǵa 31 tamyzǵa deıin shekteý qoıdy. Sol arqyly sektordaǵy baǵany turaqtandyryp, tapshylyqtyń aldyn almaqshy. Maýsym-shilde aılarynda kúnbaǵys maıyn shyǵarý kvotasy 68 myń tonna bolyp bekitildi», - dep jazady Energyprom.kz.

Otandyq óndirýshiler 2022 jyldyń aqpan-sáýir aılarynda kúnbaǵysqa degen suranysty 83,5% oryndaǵan. Óndiris kólemi byltyrǵydan 16,9% artyq. Óndirilgen 149,1 myń tonna maıdyń 66,3 myń tonnasy syrtqa satylǵan. Bul byltyrǵydan 71,3% kóp.

Al ishki naryqta kúnbaǵys maıynyń satylymy 0,6% ǵana artqan.

Aıta ketý kerek, Memlekettik kirister komıteti Aýyl sharýashylyǵy mınıstriniń 17 maýsymdaǵy buıryǵymen el aýmaǵynan kúnbaǵys maıyn áketýge sandyq shekteýler engizilgenin málimdeǵen bolatyn.


Jańalyqtar

Úrdis

MURAǴAT