Bir jylda kópbalaly otbasylarǵa 287 mlrd teńgeden astam járdemaqy tólengen

NUR-SULTAN. QazAqparat - 2021 jyly kópbalaly otbasylar 287 mlrd teńgeden astam somaǵa járdemaqy aldy, dep habarlaıdy QazAqparat.

2021 jyly kópbalaly otbasylarǵa beriletin memlekettik járdemaqy tólemderimen jalpy somasy 287,6 mlrd teńgege orta eseppen 449,4 myń otbasy qamtyldy.

Sonyń ishinde jeltoqsanda járdemaqynyń bul túrin 481,6 myń otbasy, jalpy somasy 25,9 mlrd teńge aldy.

Atalǵan memlekettik járdemaqyǵa 4 jáne odan da kóp birge turatyn kámeletke tolmaǵan nemese 23 jasqa deıingi kúndizgi bólimde oqıtyn stýdent balalary bar otbasylar tabysyna qaramastan úmitker bola alady.

Tólem mólsheri balalardyń sanyna baılanysty saralanyp tólenedi jáne 2022 jyly 49100 teńgeni (4 bala), 61 383 teńgeni (5 bala), 73 666 (6 bala) teńgeni, 85 948 teńgeni (7 bala), 8 balaǵa – 98 016 teńgeni, 9 balaǵa – 110 268 teńgeni, 10 balaǵa – 122 520 teńgeni, 11 balaǵa – 134 772 teńgeni, 12 balaǵa – 147 024 teńgeni, 13 balaǵa – 159 276 teńgeni, 14 balaǵa – 171 528 teńgeni, 15 balaǵa – 183 780 teńgeni, 16 balaǵa – 196 032 teńgeni nemese ár balaǵa 12 252 teńgeni quraıdy.

Eske sala keteıik, kópbalaly otbasylarǵa olardyń kiristerin esepke almaı beriletin jańa memlekettik járdemaqy Qazaqstanda 2020 jyldyń 1 qańtarynan bastap ataýly áleýmettik kómek kórsetýdiń jańa tetikterinde kózdelgen tabysy az jáne kópbalaly otbasylardy qoldaýdyń úsh negizgi baǵyty sheńberinde engizilgen bolatyn.