Bir kózden memlekettik satyp alýǵa qatysty ózgerister bolady
2022 jylǵy 21 maýsym 15:55

Bir kózden memlekettik satyp alýǵa qatysty ózgerister bolady

NUR-SULTAN. QazAqparat – Búgin Parlament Májilisinde «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» zań jobasy tanystyryldy, dep habarlaıdy QazAqparat tilshisi.

«Ulttyq ekonomıka mınıstrligi Memleket basshysynyń jekelegen tapsyrmalaryn iske asyrý máseleleri boıynsha zań jobasyn ázirledi. Qujatqa Prezıdenttiń 2022 jylǵy 11 qańtardaǵy Parlament Májilisiniń otyrysynda jáne bıylǵy 21 qańtardaǵy iri otandyq bıznes ókilderimen kezdesýdiń qorytyndysy boıynsha bergen zańnamalyq tapsyrmalaryn iske asyrý jónindegi jospar-kestede kózdelgen túzetýlerdiń 5 blogy engizildi. Sonymen qatar Úkimet basshylyǵynyń tapsyrmalary boıynsha engizilgen túzetýlerdiń qosymsha bloktary qamtyldy», - dedi QR Ulttyq ekonomıka vıtse-mınıstri Abzal Ábdikárimov.

Onyń aıtýynsha, «Memlekettik satyp alý týraly» Zańǵa engiziletin túzetýler tikeleı shart jasasý arqyly bir kózden memlekettik satyp alý negizderin qysqartýdy kózdeıdi. Osy oraıda sybaılas jemqorlyq táýekelderin barynsha azaıtý jáne básekelestikti damytý maqsatynda:

- memlekettik materıaldyq rezervke taýarlardy;

- jedel-izdestirý qyzmetin júzege asyrý úshin ýákiletti organdardyń qyzmettik úı-jaılaryn, kólik jáne ózge de tehnıkalyq quraldardy, aqparattyq júıelerdi, múlik pen olarǵa qyzmet kórsetý jónindegi qyzmetterdi;

- Qazaqstan Respýblıkasynyń zańnamasyna sáıkes aktimen aıqyndalǵan turǵyn emes maqsattaǵy úılerdi, qurylystardy, ǵımarattardy, úı-jaılardy satyp alý turǵysynda bir kózden satyp alý quqyǵyn alyp tastaý qajet.

Sonymen qatar vıtse-mınıstr «Kvazımemlekettik sektordyń jekelegen sýbektilerin satyp alý týraly» Zańda «Samuryq-Qazyna» qorynyń satyp alý tártibin Básekelestikti qorǵaý jáne damytý agenttigimen kelisý mindettiligi zańnamalyq turǵydan bekitiletinin aıtty.

«Qordyń básekege qabiletsiz satyp alýyn qysqartý úshin holdıng ishndegi kooperatsııa aıasynda satyp alý tásili alynyp tastalady», - dedi A. Ábdikárimov.


Jańalyqtar

Úrdis

MURAǴAT