Bilim mınıstrligi 9, 11-synyp oqýshylarynyń emtıhan tapsyrý tártibin túsindirdi
2022 jylǵy 24 mamyr 19:01

Bilim mınıstrligi 9, 11-synyp oqýshylarynyń emtıhan tapsyrý tártibin túsindirdi

NUR-SULTAN. QazAqparat – QR Bilim jáne ǵylym mınıstrligi Mektepke deıingi jáne orta bilim komıteti tóraǵasynyń orynbasary Jomart Qarambaev 9, 11 synyp oqýshylary qaı kúnderi emtıhan tapsyratyndyǵyn aıtty, dep habarlaıdy QazAqparat tilshisi.

«9 synyp oqýshylaryna emtıhan 28 mamyr men 6 maýsym aralyǵynda ótedi. Sondyqtan olar 6 maýsymda emtıhandaryn tapsyryp bitýi tıis. Endi naqty pánderge toqtalsam, 9 synyptar oqytý tili, ıaǵnı qazaq jáne orys tilderinen emtıhan tapsyrady. Onda esse jazady. Ol 28 mamyr kúni bolady. 31 mamyr kúni algebradan jazbasha emtıhan tapsyrady. Al 3 maýsym kúni orys tili qazaq mektebinde, qazaq tili orys mektebinde jazbasha ótedi. 6 maýsym kúngi sońǵy emtıhan tańdaǵan páni boıynsha uıymdastyrylady. Onda oqýshy qaı pándi tańdasa sol pánnen jazbasha emtıhan tapsyrady», - dedi ol mınıstrliktiń Instagram paraqshasynda ótken onlaın brıfıng barysynda.

Onyń atap ótýinshe, 11 synyp oqýshylary, ıaǵnı mektep túlekteri 27 mamyr men 10 maýsym aralyǵynda emtıhan tapsyrady.

«Olarda birinshi emtıhan 27 mamyrda algebra jáne analız bastamalary páninen jazbasha, ekinshi emtıhan 30 mamyrda oqytý tilinde jazbasha ótedi. 2 maýsym kúni Qazaqstan tarıhynan aýyzsha emtıhan tapsyrady. 7 maýsymda orys tili qazaq mektebinde, qazaq tili orys mektebinde jazbasha bolady. Sońǵy emtıhan 10 maýsym kúni tańdaǵan páninen tapsyrady», - dedi Jomart Qarambaev.


Jańalyqtar

MURAǴAT