Beıjiń olımpıadasynda tanylǵan qandasymyz Aqnar Adaqqyzyna aýyldastary at mingizdi
2022 jylǵy 4 sáýir 21:30

Beıjiń olımpıadasynda tanylǵan qandasymyz Aqnar Adaqqyzyna aýyldastary at mingizdi

NUR-SULTAN. QazAqparat – XXIV qysqy Olımpıada oıyndarynda Qytaı quramynda óner kórsetken qandasymyz Aqnar Adaqqyzyna aýyldastary at mingizip, atan jeteletti, dep habarlaıdy QazAqparat tilshisi.

Talaı márte respýblıkalyq jáne halyqaralyq jarystardyń bas júldesin jeńip alǵan, taıaýda ǵana Beıjiń qysqy Olımpıadasyna qatysyp óner kórsetken, el mereıin asyryp júrgen Aqnar Adaqqyzyna aýyldastary 27 naýryz kúni aýylda dúbirli toı jasap, qos birdeı tulpar mingizdi jáne atan túıe jeteletti.

Osylaısha Qytaıdyń Shyńjań ólkesi Qutybı aýdany Tasbaspaldaq aýylynyń halqy sportta top jarǵan qyzyna qazaq salty boıynsha erekshe yqylasy men qurmetin kórsetken.

Aıta keteıik, Aqnar Adaqqyzy 1999 jyly Qytaıdyń Shyńjań ólkesiniń Qutybı aýdanynda týǵan.

Aqnar 5 jasynan bastap konkı tebedi. 10 jasynda sportqa degen áýestigine kásibı túrde qarap, jattyqtyrýshysynyń baǵyt-baǵdarymen shuǵyldana bastaıdy.

2014 jyly Shyńjań qysqy oıyndarynda qatarynan 5 ret chempıon atanǵan.

Sóıtip, 15 jasynda resmı túrde Shyńjań quramasynyń músheligine ótip, ulttyq jarysqa qatysý quqyǵyna ıe bolady. Al 2016 jyly Qytaıdyń ulttyq quramasyna alynady.

Aqnar Adaqqyzy konkımen júgirýden 2018-2019 jylǵy Ulttyq chempıonatta áıelder arasynda 5000 metr qashyqtyq boıynsha chempıon atandy.

Al Jastar arasyndaǵy konkımen júgirýden 2019-2020 jylǵy Álem kýbogynyń eki kezeńine qatysqan Aqnar Adaqqyzy altynnan alqa taqqan.

Ol sol jolǵy Norvegııada ótken 3000 metr qashyqtyqta jastar arasyndaǵy konkımen júgirýden Álem kýbogynyń 1-kezeńi men Nıderlandta ótken 2-kezeńinde qatarynan eki bas júldeni qanjyǵalaǵan.

Sonymen qatar Nıderlandta ótken álem kýbogynyń ekinshi matchynda áıelder arasyndaǵy sprınterlik kópsaıysta Aqnardyń komandasy qola medal jeńip aldy.

Al byltyrǵy álem chempıonatynda Aqnar konkımen júgirýden komandalyq jarysqa qatysyp, Qytaıdyń qorjynyna qola medal salady.

XXIV qysqy Olımpıada oıyndarynda Qytaı quramynda synǵa túsken Aqnar Adaqqyzy 5 aqpanda Beıjińdegi qysqy Olımpıada oıyndarynda áıelder arasyndaǵy 3000 metrge konkımen júgirý jarysynda 4:12.28 ýaqytymen 17-orynǵa, 7 aqpanda 1500 metrge konkımen júgirý jarysynda 1:58.59 ýaqytymen 17-orynǵa ıe boldy.

Sondaı-aq, 15 aqpanda sprınterlik kópsaıysta Aqnardyń komandasy Norvegııa komandasyn jeńip, 5-oryndy qanjyǵalady.


Foto, vıdeolar TotaisalFilm wechat paraqshasynan alyndy.
Uqsas jańalyqtar
Seriktester jańalyqtary

Jańalyqtar

Úrdis

MURAǴAT