+7 (701) 759 90 19
USD 443.50 EUR 479.47
RUB 5.79 CNY 62.51
Jańalyqtar

Beıbit jınalystar týraly zań jobasynyń artyqshylyqtary qandaı

2020 jylǵy 17 aqpan 14:00
Bólisińiz:
Beıbit jınalystar týraly zań jobasynyń artyqshylyqtary qandaı

NUR-SULTAN. QazAqparat – «Qazaqstan Respýblıkasynda beıbit jınalys uıymdastyrý men ótkizý tártibi týraly» jáne «Qazaqstan Respýblıkasynyń keıbir zańnamalyq aktilerine beıbit jınalystardy uıymdastyrý men ótkizý máseleleri boıynsha ózgerister men tolyqtyrýlar engizý týraly» zań jobalary jan-jaqty talqylanyp keledi. QazAqparat agenttigi zań jobasynyń basymdyqtaryna sholý usynady.

Uqsas jańalyqtar
Dáýlet Baıdeldinov beıbit jınalystar týraly jańa zań jobasy jóninde: Barlyq kemshilikter joıylady Beıbit jınalystar týraly zań: Álemdik praktıka qandaı Qazaqstanda onlaın mıtıngiler ótkizý usynyldy

Jańa zańnyń qabyldanýy qoldanystaǵy zańnamalyq bazanyń eskirýimen baılanysty boldy. Atap aıtqanda, jańa zańda jınalysty ótkizý týraly habarlaý rásimi alǵash ret qoldanylady.

Talqylanyp jatqan qujat beıbit jınalys ótkizýdi maquldaý protsesin erkin yryqtandyrýǵa múmkindik beredi. Zań jobasynda beıbit jınalystardy tek habarlaý tártibimen pıket túrinde ótkizý múmkindigi qarastyrylady. Sonymen birge, habarlama berý tártibi ýákiletti organnan qandaı da bir jaýap nemese kelisim almaı-aq, 250-den kóp emes adam qatysatyn jıyndardy ótkizý úshin qarastyrylǵan. Beıbit jınalystar, demonstratsııalar, sherý jáne mıtıngiler ótkizýge ruqsat berý 250-den astam adam qatysqan jaǵdaıda ǵana qajet bolady.

Zań jobasy habarlamalardy nemese ótinishterdi qaraýdyń naqty jáne túsinikti retin qurýǵa múmkindik beredi. Qoldanystaǵy zań ruqsat alý ótinishterin qaraý merzimderin ǵana belgileıdi. Alaıda, ótinimdi qaraýdyń egjeı-tegjeıli tártibi rettelmegen. Osyǵan baılanysty habarlandyrý men ruqsat berýdi qarastyrýdyń naqty merzimderin; habarlamalarǵa nemese málimdemelerge qoıylatyn talaptardy; sheshim týraly uıymdastyrýshylarǵa habarlaý formasyn naqty belgileý usynylady.

Osylaısha, bul túzetýler beıbit jıynǵa qatysýshy taraptar arasyndaǵy janjaldy boldyrmaýǵa múmkindik beredi jáne azamattar men bılik arasyndaǵy qatynasqa aıqyndyq pen ashyqtyq engizbek.

Beıbit jınalystardy uıymdastyrý týraly zań jobasyna olardy ótkizý kezindegi úgit-nasıhat ınstıtýty engiziledi. Moraldyq turǵyda eskirgen qoldanystaǵy zań azamattardyń úgit-nasıhat júrgizýdegi quqyǵyn rettemeıdi. Bul maqsatta habarlamany qaraý merzimi aıaqtalǵan soń nemese beıbit jınalys ótkizýge kelisim alǵan soń, áleýmettik jelilerdi, buqaralyq aqparat quraldaryn, messendjerdi paıdalanýǵa bolady.

Jalpy, 1995 jylǵy zań jalpylama sıpatta boldy. Negizgi quqyqtyq reglament máslıhattarǵa júkteldi, bul memlekettiń ártúrli aımaqtarynda ártúrli quqyqtyq rettelýine ákep soqty. Zańnamadaǵy mundaı kemshilikter jergilikti ýákiletti organdardyń alýan túrli talaptar belgileýine kómektesti. Mysaly, Nur-Sultan qalasynyń máslıhaty beıbit jınalystar ótkizýge bolatyn oryndardy ǵana belgiledi, al basqa óńirlerde mıtıng ótkizýdi qosymsha retteý úshin basqa da erejeler men talaptar bekitilip keledi. Jańa zańnyń qabyldanýy respýblıkanyń barlyq aımaqtarynda beıbit jınalys ótkizýdiń biryńǵaı erejelerin ornatady.

Sonymen birge, qoldanystaǵy zańnyń kemshilikteriniń biri – beıbit jıyn túrleriniń naqty rettelmeýi. Osyǵan baılanysty zań jobasynda uǵymdyq apparat qurý usynylǵan. Bul beıbit jıyn, mıtıng, pıket, jınalys, demonstratsııa, sherý sııaqty negizgi uǵymdardy qalyptastyrýǵa jáne olardyń arasyndaǵy aıyrmashylyqty anyqtaýǵa múmkindik beredi.

Zań jobasy beıbit jınalystardyń negizgi qaǵıdattaryn engizýge múmkindik beredi, olardyń arasynda, eń aldymen, zorlyq-zombylyqqa, kúshteýge tyıym salý; zańdylyq; memlekettik qaýipsizdikti, qoǵamdyq tártipti, densaýlyq saqtaýdy, ózgelerdiń quqyqtary men bostandyqtaryn qorǵaýdy jáne eń bastysy – qatysý erkindigin qamtamasyz etý bar.

Odan bólek, zań jobasynda beıbit jıyndarda uıymdastyrýshylardyń, qatysýshylar men jýrnalısterdiń mártebesin, quqyqtary men mindetterin bekitý qarastyrylǵan. Qoldanystaǵy zań qatysýshylar men uıymdastyrýshylar uǵymyn ajyratpaǵan jáne jýrnalıster qyzmetiniń tártibin rettemeıdi. Jańa zańda uıymdastyrýshylar men qatysýshylardyń mártebesine, quqyqtary men mindetterine anyqtama berý usynylady. Bul beıbit jınalys qatysýshylary men uıymdastyrýshylary bolýy yqtımal adamdarǵa qoıylatyn talaptardy anyqtaýǵa kómektesedi. Oǵan qosa, uıymdastyrýshylar men qatysýshylardyń quqyqtary men mindetteri de naqty aıqyndalady, bul beıbit jınalys sýbektileri men memlekettik organdar arasyndaǵy máselelerdi retteýge múmkindik beredi.

Beıbit jınalys uıymdastyrýdy yńǵaıly etý úshin uıymdastyrýshylardy tanýǵa bolatyn belgiler qabyldanady. Aıta ketken jón, qazir qaýipsizdik maqsatynda beıbit jınalysqa baratyn jýrnalıster arnaıy forma kıip júr.

Zań jobasynyń taǵy bir basymdyǵy – beıbit jınalys ótkizýge ruqsat berilmeıtin negizderdiń naqty tizimin jasaý. Qoldanystaǵy zańda beıbit jınalys ótkizýge ruqsat bermeý negizderi anyq jazylmaǵan, al túzetýlerde naqty tizim qoldanyldy. Bul jaǵdaıda zań jobasynda beıbit jınalystar úshin balama oryn usyný quqyǵy qarastyrylǵan.

Beıbit jınalys ótkizý orny da – zań jobasyn ázirleýshiler jasaǵan mańyzdy bólikterdiń biri. Qazirgi ýaqytta túrli óńirlerdegi máslıhattar túrli jerlerde beıbit jınalys ótkizýge arnalǵan oryndar bóldi. Máselen, Almaty qalasyndaǵy «Saryarqa» kınoteatry aımaǵyndaǵy oryndy arnaıy belgileý úlken synǵa ushyrady. Osyǵan baılanysty, zań jobasynda eldi mekenderdiń ortalyq bólikterinde arnaıy oryndar belgilenip, qaýipsizdik talaptaryna saı bolýy qarastyrylǵan.

Zań jobasynyń mańyzdy tarmaǵynyń biri – beıbit jınalystar men buqaralyq is-sharalardyń basqa túrleri arasyndaǵy aıyrmashylyqty kórsetý. Zań jobasynda beıbit jıyn áreketiniń jabyq ǵımaratta ótetin qoǵamdyq is-sharalarǵa, mádenı, buqaralyq, dene tárbıesi-saýyqtyrý jáne sporttyq sharalarǵa, jergilikti qoǵamdastyqtardyń jınalystaryna, menshik ıeleriniń jınalystaryna, sondaı-aq dinı joralǵylar men rásimderge taralmaıtyny jazylǵan.

Sonymen birge, zań jobasynda beıbit jınalys erkindigin buzatyn sheshimder men áreketterge shaǵymdanýǵa múmkindik beretin bap engizý qarastyrylǵan.


Bizdiń kanalymyzǵa jazylyńyz:

Bólisińiz:

Avtor:

Aıjan Serikjanqyzy

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Erbol Janat
Erbol Janat
954-059
REDAKTOR
Aıdar Ospanalıev
Aıdar Ospanalıev
954-059

MURAǴAT