Berik Ábdiǵalıuly Prezıdenttiń aldynda kóteretin Ulytaýdyń 3 negizgi máselesin atady
2022 jylǵy 14 maýsym 14:30

Berik Ábdiǵalıuly Prezıdenttiń aldynda kóteretin Ulytaýdyń 3 negizgi máselesin atady

JEZQAZǴAN. QazAqparat – Jańadan qurylyp jatqan Ulytaý oblysynyń turǵyndaryna ekologııalyq ótemaqy tóleý máselesi zertteledi. Aımaq basshysy Berik Ádiǵalıuly QazAqparat tilshisine bergen suhbatynda Ulytaý óńirinde birinshi kezekte qolǵa alynatyn negizgi sharýalardy atady.

«Erteń óńirge Memleket basshysy da kelgeli otyr. Sol kezde Prezıdenttiń aldynda kóteretin eń úlken másele – Qyzylorda-Jezqazǵan jolyn sozbaı, tezdetip bastap, bitirý. Óıtkeni baǵanyń ózgerýine baılanysty jobany qaıta qaraǵylary kelip, óz taraptarynan jumys istep jatyr. Ekinshiden, ekologııa máselesi bar. Osy máseleni kótergimiz kelip otyr. Biz Aral óńirine kiremiz, sodan keıin geptıl máselesi bar. Ekologııalyq zardaptar dáleldense, qosymsha áleýmettik kómek kóbeıedi. Bul úlken qoldaý bolady. Úshinshiden, Jezǵazǵan qalasynyń, jalpy óńirdiń aýyzsý máselesi bar. Bizde ınfraqurylymdar ábden tozǵan. Jańaarqa, Sátpaev, Ulytaý, Jezqazǵan – bárinde de káriz júıesi, sý qubyrlary ábden tozǵan. Osynyń bárin Úkimettiń qoldaýymen, «Qazaqmys» koroporatsııasy bar, birigip, tez arada sheshýdi negizgi mindet dep topshylap otyrmyz», - dedi oblys ákimi.

Sondaı-aq Berik Ábdiǵalıuly qaıta qurylǵan óńirdi túletý úshin qosymsha qarajat kerek ekenin jetkizdi. Óńirdiń jer qoınaýyn ıgerip otyrǵan ónerkásip alpaýyttarynan da demeshýilik qarjy tartý kózdelip otyrǵan kórinedi.

«Árıne odan basqa da jobalar bar. Qazir halyq sanynyń óskenine baılanysty turǵyn úı máslesin sheshý kerek bolady. Qarajalda jol máselesi, Jańaarqada jańa kásipter ashý, Ulytaýdaǵy sý, elektr problemalary – qazirgi tańda eń alǵashqy kezekte tur.

Qosymsha qarajat suraımyz, árıne. Óıtkeni bul bir jylda ǵana sheshiletin máseleler emes, aldaǵy 2-3 jylda isteletin jumys. Sondyqtan biz onyń bárin josparlap, dáleldep, negizdeımiz. Demeýshilik qoldaý da bar. «Qazaqmys», «Qaztsınk, «Arselor Mıttal» degen mekemeler bar. Olarmen de jumys isteımiz», - dedi Ulytaý oblysynyń ákimi.

Aıta keteıik, osy aptada Prezıdent Qasym-Jomart Toqaevtyń Ulytaý, Peterbor, Tegeranǵa baratyny habarlaǵan bolatyn.





Uqsas jańalyqtar
Sondaı-aq... oqyńyz
Seriktester jańalyqtary

Jańalyqtar

Úrdis

MURAǴAT