Baızaqtaǵy jarylystan qıraǵan mekteptiń jańa ǵımaraty paıdalanýǵa berildi – Jambyl oblysy
2022 jylǵy 21 qańtar 05:30

Baızaqtaǵy jarylystan qıraǵan mekteptiń jańa ǵımaraty paıdalanýǵa berildi – Jambyl oblysy

TARAZ. QazAqparat – Jambyl oblysy Baızaq aýdanyndaǵy jarylys kezinde zardap shekken aýylda jańa mektep paıdalanýǵa berildi, - dep habarlaıdy QazAqparat tilshisi.

Ótken jyldyń tamyz aıynyń sońynda Baızaq aýdanynda bolǵan jarylys saldarynan №5 eski mekteptiń ǵımaraty múlde jaramsyz kúıge túsken bolatyn. Onyń ornyna 150 oryndyq jańa mektep nebári 4 aıda paıdalanýǵa berildi.

«Barynsha qysqa merzimde osyndaı jaıly, sapaly ǵımarat salyp bergen qurylysshylarǵa rahmetimizdi aıtamyz. Munyń bári oqýshylardyń ıgiligine arnalady. Balalar – bizdiń bolashaǵymyz desek, olardyń tárbıeli, bilimdi, ozyq oıly bolyp ósýi mańyzdy. Endi mundaǵy aýyl balalary memleket jasap otyrǵan múmkindikterdi tıimdi paıdalanyp, bıikten kórinýge kúsh salýy kerek»,-dedi oblys ákimi.

Aýyl turǵyny, qarııa Beısen Júrgenbaev 4-aq aıdyń ishinde jańa mektep salyp bergen memleket, oblys basshylyǵyna rızashylyǵyn jetkizdi.

«Men buǵan deıin osyndaı qysqa merzimde jańa mekteptiń salynǵanyn kórmeppin. Jambyl oblysynyń tarıhynda 4 aıda buryn sońdy mektep salynbaǵan. Jańa jylda balalarymyz jańa mektepke barady degenge alǵashynda eshkim senbegen edim. Biraq ol ýáde oryndaldy. Aýdandaǵy aldyńǵy qatarly mektep bizdiń aýylymyzdan boı kóterdi. Bul jiti baqylaýdyń, júıeli jumystyń nátıjesi dep bilemin»,- dedi ol.

Bul kún Shahan aýylynyń turǵyndary úshin de qýanyshqa toly boldy. Aýyl turǵyndarynyń ótinishi oryndalyp, bar-joǵy jeti aıdyń ishinde 100 oryndyq jańa mektep paıdalanýǵa berilip otyr. Buǵan deıin eski mektepte oqyǵan oqýshylar endi jańa, jaıly, zamanaýı ári sapaly salynǵan nysanda bilim almaq.

Sondaı-aq, Kókózek aýylyndaǵy T. Aqbozov atyndaǵy orta mektep ǵımaratyna, Sarykemer aýylyndaǵy Baızaq kolledjine janama salynǵan qurylys jumystary aıaqtalyp, paıdalanýǵa berildi. Nátıjesinde oqý oryndary keńeıtilip, onda keń ári jaıly sport zal jáne ashana paıda boldy.

Oblys ákimi jańadan ashylǵan nysandardyń májilis zaldarynda jergilikti turǵyndarmen kezdesip, olardyń ótinishterin, oı-pikirlerin tyńdady.


Avtor:
Tilshi

Jańalyqtar

MURAǴAT