Batys Qazaqstanda jas termeshiler baıqaýynyń jeńimpazdary anyqtaldy
2022 jylǵy 25 mamyr 04:20

Batys Qazaqstanda jas termeshiler baıqaýynyń jeńimpazdary anyqtaldy

ORAL. QazAqparat – Ǵ.Qurmanǵalıev atyndaǵy BQO fılarmonııasynyń zalynda «Ónerimniń bıigi – jyr-terme» atty jas termeshiler baıqaýynyń jeńimpaz-júldegerleri anyqtaldy, dep habarlaıdy QazAqparat tilshisi.

BQO jastar saıasaty máseleleri basqarmasynyń qoldaýymen «Ǵasyr» jastar qoǵamdyq birlestigi uıymdastyrǵan saıysqa qatysqan úmitkerler 14-18 jáne 19-29 jas erekshelikteri boıynsha baq synady.

Erejege sáıkes saıyskerler Batys maqamy stılinde jáne erkin taqyrypta eki termeden oryndady.

Baıqaý qorytyndysynda 14-18 jastaǵylar arasynda Qurmanǵazy atyndaǵy mýzyka kolledjiniń stýdenti Jasmına Palat jeńimpaz atandy.

Oral qalasy №25 orta mektep oqýshysy Sabına Jumageldına ekinshi, Dına Nurpeıisova atyndaǵy balalar mýzyka mektebiniń shákirti Temirlan Batyrbek úshinshi orynǵa ıe boldy. Osy mektepten Laýra Málikova men Syrym aýdanynan kelgen Erasyl Ómirjan «Kórermen kózaıymy» atandy.

Al 19-29 jastaǵylar arasynan M.Ótemisov atyndaǵy Batys Qazaqstan ýnıversıtetiniń stýdentteri Rysty Elshinbekova, Gúlim Іzimǵalıeva jáne Ádil Ahmetov alǵashqy úsh oryndy bólisti. Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń stýdenti Ulpan Temirbek pen Bórli aýdanynyń ókili Bektas Jumaǵalıev «Kórermen kózaıymy» boldy.

Baıqaý júldegerlerine uıymdastyrýshylar tarapynan arnaıy dıplomdar men baǵaly syılyqtar tabys etildi. Al jeńimpaz atanǵan eki jas elimizdiń rýhanı astanasy – Túrkistan qalasyn tamashalap qaıtatyn bolady.

«Atalmysh baıqaý osymen ekinshi ret uıymdastyrylyp otyr. Mundaǵy maqsat – termeni tekti ónerdiń tóresi retinde jastar arasynda keńinen nasıhattaý. Qatysýshylardyń oryndaýshylyq sheberligi árkelki bolǵanymen, jalpy betalys jaqsy», dedi QazAqparat tilshisine qazylar alqasynyń múshesi, respýblıkalyq jáne halyqaralyq jyrshy-termeshiler baıqaýlarynyń jeńimpaz-júldegeri, «Batys Qazaqstan oblysynyń úzdik mádenıet qyzmetkeri» tósbelgisiniń ıegeri Farhat Orazov.

Eske sala keteıik, budan buryn Oralda «Ulttyń úni – jyr-terme» atty jas termeshiler baıqaýy márege jetkenin , elordada alǵash ret Kúı jármeńkesi uıymdastyrylǵanyn jazǵan bolatynbyz.




Jańalyqtar

MURAǴAT