Batys Qazaqstanda koronavırýs juqtyrý kórsetkishi 27,4 paıyzǵa tómendedi
2021 jylǵy 29 qarasha 20:28

Batys Qazaqstanda koronavırýs juqtyrý kórsetkishi 27,4 paıyzǵa tómendedi

ORAL. QazAqparat – Batys Qazaqstan oblysynda sońǵy aptada (22-28 qarasha) aldyńǵymen (15-21 qarasha) salystyrǵanda, koronavırýs juqtyrý kórsetkishi 27,4 paıyzǵa (164-ten 119-ǵa) tómendedi, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamenti málim etkenindeı, 1 qarashadan beri óńirde 735 adamnyń aýyrǵany tirkeldi.

Sonyń 54 paıyzy (401) JRVI belgilerimen tekserilse, 27 paıyzy (196) profılaktıkalyq maqsatta test tapsyrǵan. 18 paıyzy (128) buryn syrqattanǵandarmen baılanysta bolsa, 1 paıyzynan (10) statsıonarǵa jatqyzar aldynda synama alynǵan.

Osy aıda memlekettik shekaradan anyqtamasyz ótken 744 jolaýshynyń bireýinen, júk tasymalymen aınalysatyn 844 júrgizýshiniń úsheýinen indet tabyldy.

Departament málimetine qaraǵanda, betperde rejımin buzǵan 15 adamǵa qatysty materıal jiberilse, sonyń altaýy – qoǵamdyq kólik júrgizýshileri, 8-i – jolaýshylar, bireýi – azyq-túlik dúkeniniń qojaıyny. Sondaı-aq qoǵamdyq tamaqtandyrý oryndaryna qatysty 4 shuǵyl habar berildi. 1,1 mln astam teńgege 14 ákimshilik hattama toltyryldy.

Qarasha aıynda úı karantınin 72 adam buzǵan, sonyń 61-i – «qyzyl», 11-i – «sary» mártebesi bar adamdar. 918 855 teńgege 21 ákimshilik hattama jasaldy.

Eske sala keteıik, budan buryn Batys Qazaqstanda 1 myńnan astam adamnyń Pfizer vaktsınasymen egilgenin jazǵan bolatynbyz.


Jańalyqtar

MURAǴAT