Batys Qazaqstanda 10 myńǵa jýyq bala sportpen tegin aınalysa alady
2022 jylǵy 27 mamyr 22:54

Batys Qazaqstanda 10 myńǵa jýyq bala sportpen tegin aınalysa alady

ORAL. QazAqparat – Batys Qazaqstan oblysynda 10 myńǵa jýyq bala sportpen tegin aınalysa alady, dep habarlaıdy QazAqparat tilshisi.

BQO dene shynyqtyrý jáne sport basqarmasy basshysynyń mindetin atqarýshy Nurlan Qazımovtiń óńirlik kommýnıkatsııalar qyzmeti alańynda ótken brıfıngide málim etkenindeı, óńirde ótken jylǵy 1 mamyrdan bastap Artsport.edu.kz aqparattyq júıesi arqyly memlekettik sporttyq tapsyrystyń jan basyna shaqqandaǵy normatıvtik qarjylandyrylý tetigi júzege asyrylýda. Bul maqsatqa ótken jyly 194,2 mln teńge bólingen bolatyn.

Onyń aıtýynsha, qazirgi kezde 25 sport túri boıynsha 10 myńǵa jýyq bala sportpen tegin shuǵyldanýǵa múmkindik aldy. Bıyl buǵan 350 mln teńge qarastyryldy.

Sonymen qatar bıylǵy 1 maýsymnan bastap ulttyq sport túrleri boıynsha oblystyq balalar-jasóspirimder sport mektebi ár aıdyń ekinshi juma kúni (saǵat 10.00-12.00) balalarǵa atpen tegin serýendeýdi uıymdastyrady. Bir mezgilde 30 balaǵa deıin qamtylady.

Sol sekildi «Qysqy sport túrleri boıynsha oblystyq balalar-jasóspirimder sport mektebiniń sheshimimen ár jeksenbi kúni (saǵ.14.00-15.00) «Muz sport saraıynda» balalar konkımen tegin syrǵanaı alady. Bir mezgilde 50 balaǵa deıin.

Osyndaı jeńildik «Jaıyq samaly» júzý basseıninde qarastyrylǵan. Ár sársenbi kúni (saǵ.11.45-12.45) balalarǵa sýda júzý tegin bolady. Bir mezgilde 40 balaǵa deıin.

N.Qazımovtiń sózine qaraǵanda, 1 maýsym – Halyqaralyq balalardy qorǵaý kúnine oraı barlyq sport alańdarynda, stadıonda túrli is-sharalar uıymdastyrylmaqshy.

«Ótken jyldyń qarasha aıynan bastap «Oblystyq otbasy úlgisindegi balalar aýyly» tárbıelenýshilerine jeke jáne ujymdyq qoldaý kórsetýge baǵyttalǵan «Tálimgerlik» baǵdarlamasy júzege asyrylyp keledi. Ujymdyq tálimgerlik boıynsha 2022 jyly aıyna eki ret Oral qalasyndaǵy 14 sport mekemelerimen kezdesý kestesi bekitildi. Balalar aýyly tárbıelenýshileri jyl basynan beri 9 sport mekemesine baryp, eńbek ujymymen, mektepte damytylatyn sport túrlerimen, úzdik tabysqa jetken sportshylarmen tanystyryldy. Jeke tálimgerlik boıynsha BQO dene shynyqtyrý jáne sport basqarmasy tarapynan oblystyq otbasy úlgisindegi balalar aýylynyń 20 tárbıelenýshisine 20 jeke tálimger bekitildi. Osyǵan sáıkes, olar tárbıelenýshilermen aptasyna 1 ret habarlasyp, aıyna 1 ret kezdesedi. Sport pen jattyǵýǵa qatysty týyndaǵan saýaldarǵa jaýap berip, sheberlik saǵattaryn ótkizedi», dedi N.Qazımov.

Budan buryn BQO-nyń úsh aýdanynda toqtap qalǵan sport kesheniniń qurylymy qaıta jandanatynyn jazǵan bolatynbyz.


Jańalyqtar

MURAǴAT