Batys Qazaqstanda 1 myńnan astam adam Pfizer vaktsınasymen egildi
2021 jylǵy 26 qarasha 14:50

Batys Qazaqstanda 1 myńnan astam adam Pfizer vaktsınasymen egildi

ORAL. QazAqparat – Batys Qazaqstan oblysynda 1086 adam Pfizer vaktsınasymen egildi, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz qyzmeti málim etkenindeı, sonyń 43-i – júkti, 451-i – bala emizetin áıelder, 592-si – jasóspirimder.

Óńirde 372 adam revaktsınatsııadan ótti.

Osy kezge deıin oblys boıynsha egilýge tıisti turǵyndardyń 59,8 paıyzy (247 878 adam) birinshi, 55,3 paıyzy (228 971) ekinshi komponentpen egildi.

Oral qalasynda 224 092 adam egilýi tıis bolsa, sonyń 126 726-sy vaktsına saldyrdy.

Pandemııa bastalǵannan beri syrqattanǵan 39 643 adamnyń 37 377-si jazylyp shyqty. 834 adam kóz jumdy. Sonyń 665-i bıyl tirkeldi. Atap aıtqanda, qańtarda – 28, aqpanda – 15, naýryzda – 30, sáýirde – 41, mamyrda – 57, maýsymda – 60, shildede – 144, tamyzda – 139, qyrkúıekte – 90, qazanda – 46, qarashada 15 naýqas qaıtys boldy. Sońǵy aptada 2 adam ómirden ozdy.

Basqarma málimetine qaraǵanda, sońǵy aptada aýyrǵandar sany 22,2 paıyzǵa (40 naýqasqa) tómendedi.

Kúni búgin 318 adam ambýlatorlyq, 118 naýqas statsıonarlyq em alýda. Sonyń ishinde 10-y jansaqtaý bóliminde. Olardyń bireýi asa aýyr halde.

Eske sala keteıik, budan buryn BQO-da qarasha aıynda 690-ǵa jýyq adamnan koronavırýs tabylǵanyn jazǵan bolatynbyz.




Jańalyqtar

Úrdis

MURAǴAT