Baspasózge ońtaıly jaǵdaı jasaý mańyzdy másele - Úkimet basshysy
2022 jylǵy 28 maýsym 10:50

Baspasózge ońtaıly jaǵdaı jasaý mańyzdy másele - Úkimet basshysy

NUR-SULTAN. QazAqparat – QR Premer-Mınıstri Álıhan Smaıylov «Buqaralyq aqparat quraldary týraly» zań jobasyn jyl sońyna deıin Parlamentke engizýdi tapsyrdy, dep habarlaıdy QazAqparat tilshisi.

«Qoǵamdyq pikirdi qalyptastyrýda buqaralyq aqparat quraldary erekshe ról atqarady. Sondyqtan memleket pen halyq arasyndaǵy tıimdi baılanys quraly bolýy úshin baspasózge ońtaıly jaǵdaı jasaý mańyzdy másele. Memleket basshysy Qasym-Jomart Kemeluly Toqaev halyqqa Joldaýynda buqaralyq aqparat quraldary básekege qabiletti jáne táýelsiz bolýy tıis ekenin atap kórsetti. Osyǵan baılanysty ázirlenip jatqan «Buqaralyq aqparat quraldary týraly» zań jobasy memlekettiń múddesin, qoǵamnyń suranysyn jáne medıa salanyń damý úrdisterin eskerýi tıis», - dedi Álıhan Smaıylov búgin Úkimet otyrysynda.

Úkimet basshysy zań jobasyndaǵy jańalyqtardy úkimettik emes uıymdardy, jurtshylyqty, sarapshylar men jýrnalısterdi qatystyra otyryp, keńinen talqylaýǵa shyǵarý qajettigin basa aıtty.

«Aqparat jáne qoǵamdyq damý mınıstrligine zań jobasyn ázirleý jumysyn jalǵastyryp, qujatty osy jyldyń sońyna deıin Parlament qaraýyna engizýdi tapsyramyn», - dedi ol.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT