«Barys» tórt oıynnan keıin alǵash ret jeńiske jetti
2021 jylǵy 20 qarasha 22:34

«Barys» tórt oıynnan keıin alǵash ret jeńiske jetti

NUR-SULTAN. QazAqparat - «Barys» búgin Qurlyqtyq hokkeı lıgasyndaǵy kezekti oıynyn Reseıde «Severstal» (Cherepovets) komandasyna qarsy ótkizdi, dep habarlaıdy QazAqparat tilshisi.

«Barys» bıylǵy týrnırdi sátsiz ótkizip júr. Sońǵy alty kezdesýdiń ekeýinde joly boldy, qalǵanynda qarsylastaryna ese jiberip qoıdy.

Saldarynan «Barys» 24 upaımen týrnır kestesinde 21-orynda keledi.

Búgingi kezdesýdi elordalyq hokkeıshiler belsendi bastaǵan edi. Nátıjesinde 2-mınýtta Kırıll Savıtskıı «Barysty» alǵa shyǵardy.

Budan keıin reseılik hokkeıshiler basymdyǵyn arttyrdy. «Severstal» sapynan Ilıa Hohlov 11, Ivan Emets 19-mınýttarda mergendik tanytty. Osylaısha olar alǵa shyqty.

Ekinshi kezeńniń 21-mınýtynda qazaqstandyq Roman Starchenko tarazy basyn teńestirdi. Al 24-mınýtta Maksım Kolmykov qaıtadan «Severstal» komandasyn alǵa shyǵardy.

«Barys» oıynshysy Olle Alsıng 48-mınýtta taǵy da tarazy basyn teńestirdi.

Negizgi kezeń 3:3 esebimen aıaqtalyp, oıyn overtaımǵa ulasty. Overtaımda «Barys» sapynan Kertıs Volk jeńis shaıbasyn soqty.

Osylaısha qatarynan tórt oıyndaǵy sátsizdikten keıin elordalyq klýb jeńiske jetti.

Endi «Barys» 23 qyrkúıekte elordada Belarýstiń «Dınamo» (Mınsk) komandasyn qabyldaıdy. Al «Severstal» syrt aıdynda «Vıtıaz» (Podolsk) komandasymen sheberlik baıqasady.

Eske salsaq, qazaqstandyq klýb budan buryn Reseıde «Spartak» (Máskeý) komandasyna ese jiberdi.



Jańalyqtar

MURAǴAT