Bári oıdaǵydaı: Qazaqstan quramasy olımpıdalyq qalashyqtarǵa ornalasty
BEIJІŃ. QazAqparat - Qazaqstandyq komandalar Qytaıǵa jetip, Olımpıadalyq qalashyqtarǵa sátti ornalasty, dep habarlaıdy QazAqparat QR Ulttyq Olımpıada komıtetine silteme jasap.
Qysqy Olımpıada oıyndary úsh klasterde, atap aıtqanda, Beıjiń, Chjantszıakoý jáne ıAntsın aımaqtarynda ótedi.
Muz aıdynyndaǵy barlyq jarys Beıjińde ótedi. Qytaı astanasyndaǵy Olımpıadalyq qalashyqta konkımen júgirý jáne short-trekten Qazaqstan quramalary ornalasty. Olımpıadalyq kartadaǵy eń alys aımaq – kórshi Hebeı provıntsııasynda ornalasqan taýly Chjantszıakoý boldy. Onda frıstaıl-mogýl, tramplınnen shańǵymen sekirý, shańǵy jarysy jáne shańǵy qossaıysy boıynsha qurama komandalar jaıǵasty. Al ıAntsınde taý shańǵysynyń sportshylary ornalasty.
«Beıjińge kelip, mindetti PTR synaqtarynan ótkennen keıin birden Olımpıadalyq qalashyqtaryna bardyq. Beıjiń men Chjantszıakoý arasyndaǵy jol 3 saǵatqa sozylady. Bizdiń frıstaıl-mogýl, tramplınnen shańǵymen sekirý jáne shańǵy qosaıysy qurama komandalar osynda boldy. Basqa komandalardy kútemiz. Bári oıdaǵydaı. Munda kún ashyq bolǵanymen, sýyqtaý. Al sportshylardyń kóńil kúıi birqalypty, jaqsy.
Bizdiń qalashyqqa ornalasýymyz Halyqaralyq Olımpıada komıtetiniń prezıdenti Tomas Bahtyń Olımpıadalyq qalashyqqa saparymen tuspa-tus keldi. Ol sportshylarmen tildesip, aldaǵy jarystarda sáttilik tiledi. Olımpıada oıyndary – kez kelgen sportshynyń ómirindegi óte mańyzdy oqıǵa. Bul kezdesý bizdiń sportshylardy burynǵydan da qanattandyryp, shabyttandyrdy dep oılaımyn», - dep atap ótti Qazaqstan Respýblıkasy Ulttyq shańǵy qaýymdastyǵynyń bas hatshysy Asqar Valıev.
Kezdesý barysynda olımpıadalyq dástúr de saqtalyp, HOK basshysy sportshylarmen estelik tósbelgilerimen almasty.
«Olımpıadalyq qalashyqqa kelgendegi sezimim erekshe, ony sózben aıtyp jetkizý múmkin emes. Munda barlyǵy óte joǵary dárejede uıymdastyrylǵan. Komandamyz da óz kezeginde bul startqa tas túıin daıyn. Jan-jaqty, psıhologııalyq jáne fızıkalyq turǵydan daıyndaldy. Alǵashqy kúni-aq HOK basshysy Tomas Bahpen kezdestik. Ol maǵan bir-eki sımvoldyq suraq qoıyp, kóńil-kúıimdi, qobaljý bar-joǵyn surady. Sondaı-aq, árıne, sáttilik tiledi», - dep bólisti frıstaıl-mogýldan Qazaqstan quramasynyń múshesi Anastasııa Gorodko.
Aıta keteıik, Qazaqstan quramasynyń sportshylary arasynda jarysqa birinshi bolyp mogýlshylar shyǵady. Mogýl boıynsha irikteý jarystary Olımpıada oıyndarynyń ashylý saltanatyna deıin, 3 aqpanda ótedi.
XXIV qysqy Olımpıada 4-20 aqpan aralyǵynda ótedi. Oǵan Qazaqstan quramasynan barlyǵy 34 sportshy qatysady, olar 87 joldama jeńip aldy. Qazaqstandyqtar shańǵy jarysy, frıstaıl akrobatıka jáne mogýl, konkımen júgirý, short-trek, bıatlon, taý shańǵysy, tuǵyrdan sekirý, shańǵy qossaıysy sııaqty 8 sport túrinen synǵa túsedi.
