Balyq aýlaý maýsymy bastalǵaly 12 adam sýǵa batyp ketti - TJM

NUR-SULTAN. QazAqparat - Balyqshylardyń sý aıdynynda qaza bolý jaǵdaılary jıilep ketti, dep habarlaıdy QazAqparat Tótenshe jaǵdaılar mınıstrliginiń resmı ókili Talǵat Ýálıge silteme jasap.

Ań jáne balyq aýlaý maýsymy bastalǵannan beri (1 qazan-22 qarasha) eldiń sý aıdyndarynda 12 adam, onyń ishinde 1 bala qaza tapty.

Balyq aýlaý kezinde ereje saqtamaǵan 11 adam qaza tapty jáne eresek adamdardyń qaraýynsyz qalǵan 1 bala abaısyzda sýǵa qulap, batyp ketti.

Bıyl qaza bolǵandar Aqmola, Almaty, Qostanaı, Qyzylorda, Mańǵystaý, Túrkistan oblystarynda tirkeldi.

Máselen, ótken kúz-qys maýsymynda (2019 jylǵy 1 qazannan bastap 2020 jylǵy 1 naýryzǵa deıin) elimizdiń sý aıdyndarynda 37 adam (onyń ishinde 10 bala) kóz jumǵan .

Jazataıym oqıǵanyń negizgi sebepteri:

- 19 adam balyq aýlaý kezinde (jaǵalaýdan nemese qaıyqtan) sýǵa qulaǵan;

- 7 adam balyq aýlaý kezinde muz astyna túsip ketken;

- oınap júrip 8 bala muz astyna túsip ketken, 2 bala sýǵa qulaǵan;

- 1 adam muz ótkeli arqyly ótip bara jatqanda qulaǵan.

Aýmaq boıynsha alyp qarasaq, qaza bolǵandar Aqmola, Atyraý, Almaty, Aqtóbe, Shyǵys-Qazaqstan, Jambyl, Batys-Qazaqstan, Qostanaı, Qaraǵandy, Soltústik Qazaqstan oblystarynyń jáne Almaty qalasynda tirkeldi.

Qys mezgilinde sý aıdynynda qatań saqtalýǵa tıis qaýipsizdik erejeleri:

- táýliktiń qarańǵy ýaqytynda jáne nashar kóringen kezde muzǵa shyqpańyz;

- muzdyń juqa jáne qatpaǵan jerine shyqpańyz;

- muzdaǵy shuńqyrlarǵa, jaryqtarǵa, oıyqtarǵa jaqyndamańyz;

- avtomobılmen ótkelden tys jerge shyqpańyz.