Balqash kólin damytýdyń bas jospary ázirlendi
2022 jylǵy 21 sáýir 19:40

Balqash kólin damytýdyń bas jospary ázirlendi

TALDYQORǴAN. QazAqparat - Balqash kólin damytýdyń bas jospary ázirlendi, - dep habarlaıdy QazAqparat.

Sarqan aýdanynyń kókónis pen alma ósirýde, taý týrızmi men Balqash jaǵalaýyn damytýda, balyq sharýashylyǵyn órkendetýde múmkindigi mol. Degenmen munda shaǵyn jáne orta bıznes áli de keń óris ala almaı otyr. Ázirge aýdannyń oblys kóleminde osy saladaǵy úlesi nebary 2,2%. Bul týraly búgin Sarqan aýdanynyń halqymen kezdesý ótkizgen Almaty oblysynyń ákimi Qanat Bozymbaev aıtty.

«Munda taý týrızmi men Balqash kóliniń jaǵalaýyn damytýǵa erekshe mán beriledi. Qazir «Balqash» týrıstik-rekreatsııalyq aımaq» jobasynyń egjeı-tegjeıli jospary daıyn. Osy aımaqqa júrgiziletin ınjenerlik kommýnıkatsııa júıeleri qurylysynyń da joba-smetalyq qujattary jasaldy. Balqashqa aparatyn jol jóndelip jatyr. Osy sharalardyń barlyǵy munda keletin týrıster legin 5 esege arttyrady dep josparlanǵan. Balqash jaǵalaýynda zamanaýı demalys aımaǵyn quryp, servıs sapasyn kóterý úshin ınvestorlar tartýdy jandandyrý kerek. Sarqannyń balyq sharýashylyǵyn damytatyn áleýeti bar. Biraq balyq ósirýmen aınalysatyn nebary 2 sharýashylyq qana tirkelgen. Oblys boıynsha daıyndalatyn Balyq sharýashylyǵyn damytý baǵdarlamasyna Sarqan aýdany da úles qosýy tıis», - dedi ol.

Balqash kóliniń jaǵasyna ınfraqurylym tartsa, jaǵalaýdy damytsa, kásibimizdi odan ári keńeıter edik degen lepsilik turǵynnyń da saýaly ózekti.

«Demalys aımaǵyna sý, jaryq sııaqty ınjenerlik júıeler júrgizýdi bastaý úshin aldymen sol jerge keletin ınvestorlardy anyqtap alýymyz kerek. Týrıster jalpy talapshyl, kirpııaz bolady, sondyqtan bizge tájirıbesi mol, týrızm salasyna mamandanǵan ınvestorlardy, máselen túrik aǵaıyndar bar, Alakól jaǵalaýynda jumys isteıtin tájirıbeli kompanııalar bar, solardy tartý kerek. Meniń orynbasarym Arslan Dándibaev 3-4 aıda bul isti retteıdi dep oılaımyn», - dedi oblys ákimi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT