USD 435.1 EUR 493.27
RUB 5.69 CNY 68.63
Jańalyqtar

Baldyrǵandarmen jumys isteý – úlken baqyt – Úmit Eljanova, tárbıeshi

2021 jylǵy 3 qazan 17:11
Bólisińiz:
Baldyrǵandarmen jumys isteý – úlken baqyt – Úmit Eljanova, tárbıeshi

ORAL. QazAqparat – Kishkentaı baldyrǵandarmen jumys isteý – úlken baqyt. 2021 jylǵy respýblıkalyq «Úzdik pedagog» baıqaýynyń jeńimpazy, Aqsaı qalasyndaǵy №3 «Gúlder» bóbekjaıynyń tárbıeshisi, pedagog-zertteýshi Úmit Eljanova QazAqparat tilshisiniń suraqtaryna jaýap berdi.

Uqsas jańalyqtar
Bıyl Temirtaýda apatty jaǵdaıda turǵan birqatar oqý oryndary jóndeýden ótedi QR Bas memlekettik sanıtarlyq dárigerdiń qaýlysyna karantın merzimi boıynsha ózgerister engizildi Mekteptegi kanıkýldardyń merzimi bekitildi

-Úmit Qaıyrǵalıqyzy, óz salańyz boıynsha ozyp shyǵyp, «Úzdik pedagog» atanǵan ekensiz. Sońǵy ýaqytta bilim salasynda reformalar qolǵa alynyp jatqany belgili. Osyǵan oraı balabaqshalarda ne istelýi kerek dep oılaısyz?

- Ómirde mamandyqtyń túri kóp ekendigi belgili. Sonyń ishinde dúnıege kelgen sábıge ata-anasynan keıin baǵyt-baǵdar beretin tárbıeshi mamandyǵy da sondaı jaýapty der edim.

Kúnde erteńgisin jumysqa kelgende, balalarmen birge bolǵan árbir ýaqytym meni jańa álemge jetelegendeı bolady. Aldymda otyrǵan jas búldirshinderimniń súıkimdi de ádemi, baısaldy da aqyldy júzderin kórýdiń ózi qýanyshqa bóleıdi. Olardyń menen kútetini óte kóp ekendigin uǵyndyrady. Odan saıyn shabyttana, qanattana túsesiń.

«Balany eń áýeli meıir-shapaǵatqa, odan soń aqyl-parasatqa, aqyrynda naǵyz paıdaly ǵylymǵa, eńbekke baýly» degen uly Abaı. Olaı bolsa jas urpaqqa meıirim, shapaǵat nuryn seýip, eńbekke baýlýmen qosa Otanǵa, Ana tilge degen mahabbatyn baıytý, olarǵa týra baǵyt-baǵdar berý, mine, osy balabaqshadan bastalady.

Shynymdy aıtsam, mektepke deıingi jastaǵy balalarmen jumys isteý, olardyń Qazaqstan Respýblıkasynyń tárbıeli, aqyldy, bilimdi azamattary bolýlaryna úles qosý – men úshin úlken baqyt. Osy kishkentaı búldirshinderdi 26 jyl boıy oqytyp, tárbıelep kelemin. Osy qyzmetimde ózim únemi izdenip, jańa zamanaýı tehnologııalarmen tanysyp, óz bilimimdi tolyqtyryp, úırenip, ony balalardyń sanasyna quıyp, úıretýden jalyqpadym, óıtkeni ózime mamandyǵym unaıdy. Halyqaralyq, respýblıkalyq, oblystyq deńgeıde tájirıbelerimdi bólisip, baıqaýlarǵa qatysyp, júldeli oryndarǵa ıe boldym. Sonymen qatar tárbıelenýshilerimdi de sondaı deńgeıdegi baıqaýlarǵa qatystyryp kelemin. Óz isiniń sheberi ǵana joǵary jetistikterge jetedi degendeı, osyndaı jetistikter men eńbektiń arqasynda «Úzdik pedagog – 2021» ataǵyna ıe boldym.

Memleket tarapynan bilim berý salasyna udaıy kóńil bólinip keledi. Sonyń ishinde balabaqshalarda da jańashyldyqpen jumys isteý kerektigine, kreatıvtilik pen synı oılaýdy damytýǵa basa nazar aýdaryldy. Saıyp kelgende, qazirgi zaman talabyna saı oqytý men tárbıeleýdiń sapasyn mektepke deıingi kezeńnen bastap kóterýdiń mańyzy zor.

Mektepke deıingi jastaǵy balanyń boıynda shyǵarmashylyq qııaldy, kreatıvtilikti, bilim-bilikteri men daǵdylaryn damytyp, synı oılap, óz oıyn ashyq aıta bilýge jáne komandada jumystana bilýge baýlý qajet dep oılaımyn. Osy oraıda balanyń sóıleý belsendiligin arttyratyn oqytý men tárbıeleýdiń bir túri – oıyn. Oıyn túrlerin balabaqshada utymdy paıdalana bilgen tárbıeshi ozady dep bilemin.

-Kishkentaı búldirshinderdiń ana tilinde bilim-tárbıe alýy mańyzdy. Osyǵan baılanysty ne aıtar edińiz?

- Til mádenıetin meńgerý sábı shaqtan bastalady. Balanyń tilin damytýdy otbasynda, qoǵamdyq orynda jáne mektepke deıingi uıymda júıeli júrgiziletin tárbıe protsesi barysynda júzege asyrýǵa bolady. Bul rette, árıne, balabaqshanyń orny erekshe. Onda qazaq tilin úıretýde sózdik jumys qorshaǵan ortamen, kúndelikti ómirmen tyǵyz baılanystyryla júrgiziledi. Balanyń jasy eskerilip, jańa sózder túrli oıyndar arqyly úıretiledi. Sóıtip baldyrǵannyń oılaý jáne sóıleý qabileti damyp, sózdik qory molaıa túsedi.

-Óz jumysyńyzdaǵy basty ustanymyńyz qandaı, aldaǵy josparlaryńyzben de bólisseńiz?

- Tárbıeshi bala tárbıeleý úshin eń aldymen ózi ana bolýy kerek dep oılaımyn. Negizgi ustanymym osy. Sebebi ana júregi árqashan meıirimge toly. Túptep kelgende, balaǵa bilgenimdi úıretsem, tárbıelesem, jaqsy tulǵa bolyp qalyptasýyna bir tamshy sýdaı úles qossam dep aldyna úlken mindet qoıa bilgen qaı tárbıeshi de óz maqsatyna jete alady. Aldaǵy oıym da – zamanaýı jańa tehnologııalarmen óz bilimimdi tolyqtyra otyryp, ony búldirshinderge jetkize bilý.

Qoryta aıtqanda, qazirgi baldyrǵandar – ult bolashaǵy. Elimizdiń keleshegi kemel bolýy úshin onyń irgetasy myqty qalanýy kerek. Sondyqtan tárbıeshiler de ózderine júktelgen mindetti jaýapkershilikpen atqaryp, senim údesinen shyǵa bilse, budan ata-ana da, mektepke deıingi uıym da, túptep kelgende, tutas qoǵam da utady.

Eske sala keteıik, budan buryn Ásel Ermentaevanyń ustazdyń abyroı-bedeli onyń ózine baılanysty ekenin, Dámetken Baenovanyń muǵalimge qurmet te, mártebe de qajyrly eńbekpen keletinin aıtqanyn jazǵan bolatynbyz.

Sondaı-aq Quralaı Isqaqova ustazǵa oqyp-úırený men izdenýdi ómir boıy toqtatpaýy kerektigin jetkizdi.



Bizdiń kanalymyzǵa jazylyńyz:

Bólisińiz:

Avtor:

Eljan Eraly

Uqsas jańalyqtar
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Janat Qapalbaeva
Janat Qapalbaeva
954-059

MURAǴAT