«Baqytty otbasy» baǵdarlamasy boıynsha ótinim qabyldaý bastaldy
2022 jylǵy 20 maýsym 13:32

«Baqytty otbasy» baǵdarlamasy boıynsha ótinim qabyldaý bastaldy

NUR-SULTAN. QazAqparat - Otbasy bank «Baqytty otbasy» ıpotekalyq turǵyn úı baǵdarlamasy boıynsha ótinim qabyldaýdy bastady, dep habarlaıdy QazAqparat bnktiń baspasóz qyzmetine silteme jasap.

«Baqytty otbasy» baǵdarlamasyna qatysý týraly ótinim otbasybank.kz platformasynda 20 maýsym men 19 shilde (qosa alǵanda) aralyǵynda qabyldanady. Ol úshin Otbasy bank klıenti bolý qajet jáne aýtentıfıkatsııa kodyn alý úshin qolda uıaly telefon bolýy kerek. Qosymsha anyqtamalar men qujattar qajet emes. Júıe úmitkerdiń derekterin tekserip, ótinish qalyptastyrady.

Baǵdarlamaǵa qatysý úshin jergilikti organda turǵyn úı kezeginde turý qajet. Ótinim bere alatyn sanattar:

- kópbalaly otbasy;

- múmkindigi shekteýli bala tárbıelep otyrǵan otbasy;

- tolyq emes otbasy (neke buzylǵan sátten bastap keminde 3 jyl ótýi kerek).

Bankten málim etkendeı, «Baqytty otbasy» baǵdarlamasy boıynsha 2021 jyly ótinim bergen, alaıda baspana almaǵan azamattar bıyl ótinimdi qaıta berýi qajet.

Ótinim qabyldaý aıaqtalǵannan keıin qatysýshylardyń negizgi jáne rezervtik tizimderi avtomatty túrde qalyptastyrylady. Tizimderge bólý kezinde qatysýshylardyń jergilikti ákimdikte kezekke turý kúni men sanaty eskeriledi. Konkýrs nátıjelerin otbasybank.kz portalynan kórýge bolady.

«2022 jyly «Baqytty otbasy» baǵdarlamasy boıynsha 5 myńnan astam otbasyǵa nesıe berýdi josparlap otyrmyz. Qazirdiń ózinde Otbasy bankke 51 mlrd teńge kóleminde qarajat tústi. Bıyl lımıtterdi baǵdarlamaǵa qatysýshylar arasynda bólý kezinde basymdyq ótken jyldaǵydaı, múmkindigi shekteýli balalardy tárbıelep otyrǵan otbasylarǵa beriledi», - dep túsindirdi «Otbasy bank» AQ Basqarma Tóraıymy Lázzat Ibragımova.

Aıta keteıik, búginge deıin «Baqytty otbasy» baǵdarlamasymen 14 500 qazaqstandyq otbasy qonys toıyn toılady. Taǵy 326 qatysýshynyń nesıe alý týraly ótinimi maquldandy, olar qazir baspana izdeýde.

«Baqytty otbasy» baǵdarlamasy talaptarynyń biri: azamattardyń kirisi tekseriledi. Sońǵy alty aıda otbasynyń árbir múshesine shaqqanda tabys eń tómengi kúnkóris deńgeıiniń 3,1 eselengen mólsherinen aspaýy kerek (2022 jyly KM 37 389 teńge, sáıkesinshe bir otbasy múshesine shaqqandaǵy tabys 115 905 teńgeden aspaýy tıis).

Nesıe somasynyń 10% teń bastapqy jarna bolǵan jaǵdaıda, jyldyq 2% mólsherlememen jeńildetilgen zaem beriledi. Nesıe merzimi 20 jylǵa deıin.

Otbasy jergilikti ákimdikter arqyly salynǵan turǵyn úıdi nemese bastapqy jáne ekinshi naryqtaǵy kez kelgen páterdi satyp ala alady. Sonymen qatar jeke úı satyp alýǵa da ruqsat etiledi. Nesıeniń eń joǵary somasy Nur-Sultan, Almaty qalalarynda jáne olardyń mańyndaǵy aýdandarynda, Shymkent, Aqtaý, Atyraýda 15 mln teńgege deıin jáne basqa óńirlerde 10 mln teńgege deıin. Jyljymaıtyn múlik qaryz alýshy turǵyn úı kezeginde turǵan aımaqtan satyp alynýy tıis.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT