Baqytgúl Hamenovaǵa qatysty sot 5 qyrkúıekte qaıta jalǵasady
2022 jylǵy 13 tamyz 15:47

Baqytgúl Hamenovaǵa qatysty sot 5 qyrkúıekte qaıta jalǵasady

ATYRAÝ. QazAqparat – Atyraý oblysy ákiminiń burynǵy orynbasary Baqytgúl Hamenovaǵa qatysty sot otyrysy 5 qyrkúıekte qaıta jalǵasady, dep habarlaıdy QazAqparat.

Sotta kýágerler Atyraý qalalyq mádenıet jáne sport bóliminiń esep jáne esepteý bóliminiń meńgerýshisi Lıza Ýkeshova men Saraıshyq aýyldyq okrýginiń ákimi Jeksenbaı Fazýlovtyń jaýaby tyńdaldy. Olardan ózge úsh kýáger belgisiz sebeptermen sot protsesine kelmeı qaldy.

Endi sottyń kelesi otyrysy 5 qyrkúıekte jalǵasady.

Buǵan deıin 11 tamyzda Atyraýda oblys ákiminiń orynbasary bolǵan Baqytgúl Hamenovaǵa, Atyraý oblysy mádenıet, tilderdi damytý jáne arhıv isi basqarmasynyń basshysy Aqylbek Rysqalıev pen «Balqytý» JShS dırektory Ómirtaı Adamovqa qatysty sot ótip jatqanyn jazǵan bolatynbyz.

Baqytgúl Hamenova men Aqylbek Rysqalıevtyń isi QR Qylmystyq kodeksiniń 366-babynyń 3-bóliginiń 3-tarmaǵymen tergelgen. Al, «Balqytý» JShS dırektory Ómirtaı Adamov QR Qylmystyq kodekstiń 367-babynyń 2-bóligimen tergeýge alynǵan.

Atyraý oblysy ákiminiń orynbasary qyzmetin atqarǵan Baqytgúl Hamenova Abaı eskertkishin ornatýǵa bólingen qarajattan para aldy degen kúdikke ilingen. Ol byltyrǵy jeltoqsan aıynda ustalyp, tergeý ızolıatoryna qamaldy.

Sotta Baqytgúl Hamenova ózine taǵylǵan aıypty moıyndamaıtynyn málim etti. Onyń isine qatysty aıyptaý aktisi 55 betti quraǵan.

Sottan Baqytgúl Hamenovanyń advokaty Igor Vranchev óz klıentiniń bultartpaý sharasyn ózgertýdi, ony tergeý ızolıatorynan úı qamaýyna aýystyrýdy surady. Sondaı-aq, aıyptalýshy men onyń anasynyń densaýlyǵyn eskerýdi, kámeletke tolmaǵan balalarynyń baryn alǵa tartty.

Biraq, sot advokattyń Baqytgúl Hamenovany úı qamaýyna jiberý týraly ótinishin qanaǵattandyrǵan joq.

Baqytgúl Hamenova 2020 jyldyń naýryz aıynda Atyraý oblysy ákiminiń orynbasary bolyp taǵaıyndalǵan edi. Ol bul taǵaıyndaýǵa deıin altynshy saılanǵan Parlament Májilisiniń depýtaty bolǵan. Budan bir apta buryn oblys ákiminiń orynbasary laýazymynan bosatylǵan.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT