BAÁ bıligi jazda kólikterdiń órtenýine jol bermeý úshin usynystar ázirledi
2022 jylǵy 22 maýsym 21:55

BAÁ bıligi jazda kólikterdiń órtenýine jol bermeý úshin usynystar ázirledi

ABÝ-DABI.QazAqparat – Abý-Dabıdiń Azamattyq qorǵanysy kólik júrgizýshilerine ystyq aýa raıynda avtokólikterdiń órtenýi múmkin ekenin eskertti. Osyndaı oqıǵalardy boldyrmaý úshin júrgizýshilerdi kólikterin únemi tekserip otyrýǵa shaqyrdy, dep habarlady QazAqparat tilshisi Khaleej Times-qa silteme jasap.

Abý-Dabı azamattyq qorǵanys basqarmasynyń bas dırektory, brıgadır general Muhammed Ibrahım ál Amerı avtomobıl órtteriniń kópshiligi júrgizýshilerdiń qaýipsizdik pen aldyn-alý sharalaryn elemeýinen bolatynyn aıtty.

Olarǵa ol kólik quraldaryna merzimdi tehnıkalyq qyzmet kórsetilmeýi, avtomobıl júıesindegi elektrlik jáne tehnıkalyq aqaýlar, turaqtaǵy kólikterdiń ishinde qoldy tazartqysh quraldar, parfıýmerııa jáne ottyqtar sııaqty janǵysh zattardyń qalýy jatady.

Avtokóliktegi órtterdiń aldyn alý úshin olardyń ıelerine avtomobıldiń salqyndatý júıesin, qozǵaltqysh maıynyń deńgeıin únemi tekserip, baqylaýǵa alý, arnaıy tehnıkalyq mamannyń júıeli túrde qyzmetine júginý, janarmaı bagynyń qaqpaǵyn myqtap jabý, maıdyń aǵyp ketýine jol bermeý jáne qyzyp ketken avtomobıldiń janynda temeki shegýden bas tartý usynyldy.

Sondaı-aq júrgizýshilerge kólikte órt sóndirgish pen alǵashqy kómek qobdıshasyn ustaýǵa keńes berildi.

«Dezınfektsııalaý quraldarynyń quramynda janǵysh alkogol komponentteri bar, sondyqtan olardy kólikterde qaldyrýǵa bolmaıdy. Júrgizýshiler, ásirese kún sáýlesi tikeleı túsetin jerde turǵanda, kóliginiń terezelerin tolyǵymen jappaýy kerek», - dedi bılik ókilderi.

Sáýir aıynda Dýbaı ámirliginiń polıtsııasy osy jyldyń alǵashqy tórt aıynda kólik quraldaryndaǵy, avtobýstar men aýyr júk kólikterin qosa alǵanda, 94 órtti sóndirýge qatysqanyn habarlady.


Uqsas jańalyqtar

Jańalyqtar

Úrdis

MURAǴAT