Azyq-túlik qymbattyǵy: Úkimet basshysy Nur-Sultan jáne 3 óńir basshylaryn synǵa aldy
2022 jylǵy 29 qańtar 17:19

Azyq-túlik qymbattyǵy: Úkimet basshysy Nur-Sultan jáne 3 óńir basshylaryn synǵa aldy

NUR-SULTAN. QazAqparat - QR Premer-Mınıstri Álıhan Smaıylov Úkimettiń Tsıfrlyq keńsesinde QR Prezıdenti Qasym-Jomart Toqaevtyń jyl basynan bergen tapsyrmalaryn iske asyrý jóninde keńes ótkizdi. QazAqparat bul týraly primeminister.kz saıtyna silteme jasap habarlaıdy.


Keńeste áleýmettik mańyzy bar azyq-túlik taýarlarynyń baǵasyn turaqtandyrý jáne jastardy jumyspen qamtý máseleleri qaraldy. Áleýmettik mańyzy bar azyq-túlik ónimderi baǵasynyń eń kóp ósimi Nur-Sultanda – 1,5%, Aqmola oblysynda – 1,4%, Aqtóbe oblysynda – 1,1% jáne Jambyl oblysynda – 1% tirkeldi.

Úkimet basshysy atalǵan óńirler ákimdikteriniń, sondaı-aq Aýyl sharýashylyǵy mınıstrliginiń halyqty qoljetimdi baǵada áleýmettik mańyzy bar azyq-túlik taýarlarymen qamtamasyz etý jónindegi jumysyn synǵa aldy.

«Ákimder men Aýyl sharýashylyǵy mınıstrligi turaqtandyrý qorlarynyń mınımaldy kólemin qalyptastyrǵan joq, «aınalym shemasy» boıynsha jetkilikti qarajat bólinbegen, saýda ústemelerine baqylaý nashar júrgizilgen. Іs júzinde, áleýmettik mańyzy bar azyq-túlik taýarlary baǵasynyń ósýin tejeý jumysy birizdi atqarylyp jatqan joq. Sizderdiń mindetterińiz – halyqqa birinshi kezekte qajetti taýarlardy qoljetimdi baǵada qamtamasyz etý», — dep atap ótti Á. Smaıylov.


Premer-Mınıstr ortalyq memlekettik organdar men ákimdikterge azyq-túliktiń árbir ataýy boıynsha baǵany baqylaýdy kúsheıtýdi, turaqtandyrý qorlarynda qajetti kólemdi qamtamasyz etýdi jáne «aınalym shemasyna» qosymsha qarjy bólýdi tapsyrdy.

«Baǵa belgileý tizbegin tergeý jónindegi óńirlik komıssııalardyń jumysyn kúsheıtip, bólshek saýda nysandarynyń saýda ústemesiniń ruqsat etilgen mólsherin saqtaýyn qadaǵalańyzdar», — dedi Á. Smaıylov.


Úkimet basshysy jastardyń jumyssyzdyq deńgeıin tómendetý maqsatynda Eńbek jáne halyqty áleýmettik qorǵaý mınıstrligine Ulttyq ekonomıka jáne Qarjy mınıstrlikterimen birlesip, «Jastar praktıkasy» jáne «Alǵashqy jumys orny» jobalaryna qatysý uzaqtyǵy men eńbekaqy mólsherin ulǵaıtý múmkindigin qarastyrýdy tapsyrdy. Atalǵan jobalar boıynsha eńbekaqy mólsherin 20-25 AEK-ten 30 AEK-ke deıin arttyrý kózdelgen. «Jastar praktıkasynyń» merzimi 6 aıdan 12 aıǵa deıin, «Alǵashqy jumys orny» jobasy 12 aıdan 18 aıǵa deıin uzartylady. «Jastardy oqytý, kásiptik baǵdarlaý jáne jumysqa ornalastyrý máselelerine kóbirek kóńil bólý qajet. Tıisti tarmaqtar Úkimettiń 2022 jylǵa arnalǵan is-qımyl baǵdarlamasyna engiziledi», — dep atap ótti Á. Smaıylov.


Jańalyqtar

MURAǴAT