Jańalyqtar  >
Ázerbaıjan arqyly munaı tasymaldaý jospary joq – Energetıka mınıstri
2022 jylǵy 13 tamyz 01:47

Ázerbaıjan arqyly munaı tasymaldaý jospary joq – Energetıka mınıstri

ATYRAÝ. QazAqparat – Qazaqstannan Ázerbaıjan Respýblıkasy arqyly munaı tasymaldaý josparlanyp otyrǵan joq. Bul týraly Energetıka mınıstri BolatAqsholaqov Atyraýda ótken brıfıngte aıtty, dep habarlaıdy QazAqparat tilshisi.

Mınıstrdiń pikirinshe, ulttyq kompanııalar arasynda mundaı máseleni talqylaýy múmkin. Biraq Energetıka mınıstrliginde dál osyndaı kelisimge qol qoıý máselesi josparlanbaǵan.

«Mundaı aqparatty oqydym. Biraq mundaı máseleler tehnıkalyq turǵydan ulttyq kompanııalar deńgeıinde qarastyrylyp, talqylanatynyn aıtqym keledi. Óıtkeni talap sondaı. Másele qyrkúıek aıynda munaı jóneltý jónindegi kelisimge qol qoıý týraly bolyp otyrǵan joq», -dep málim etti Bolat Aqsholaqov.

Ol talqylanyp jatqan bul másele eksport máselesin sheshýge kómektespeýi múmkin ekendigin aıtty.

«Aqparattyq resýrsta aıtylyp jatqan kólemmen bizdiń eksporttyq baǵyttaǵy problemany sheshý aqylǵa syımaıdy. Nege? Óıtkeni, birinshiden, atalǵan baǵytpen 1,5 mln tonna munaıdy eksporttaý qazirgi ahýaldy aıtarlyqtaı jeńildetpeıdi. Ekinshiden, bizdiń mınıstrlikte dál mundaı kelisimge qol qoıý jospary joq», -dedi mınıstr.
Aıta ketsek, álemdik Reuters agenttiginde Qazaqstan Ázerbaıjan aýmaǵymen ótetin munaı qubyrlary arqyly jylyna 1,5 mıllıon tonna munaı eksporttaýdy josparlap otyr degen syńaıda maqala jarııalandy.

Onyń ústine buǵan deıin QR Prezıdenti Qasym-Jomart Toqaev munaı tasymaldaý isin ártaraptandyrýdy mańyzdy mindet dep atap, tıisti tapsyrma bergen edi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT