Áıelderdiń zeınetke shyǵý jasy ár bala týǵan saıyn qysqartyla ma
ASTANA. QazAqparat – Premer-Mınıstr Álıhan Smaıylov áıelderdiń zeınetke shyǵý jasyn ár bala týǵan saıyn 2 jylǵa qysqartý týraly Májilistiń taratylǵan 7-shi shaqyrylym depýtattarynyń usynysyna jaýap berdi, dep habarlaıdy QazAqparat tilshisi.
«Qazaqstanda bazalyq, yntymaqty jáne jınaqtaýshy zeınetaqy komponentterin qamtıtyn úsh deńgeıli zeınetaqy júıesi jumys isteıdi. Onyń mólsheri eńbek ótiline baılanysty aıqyndalady. Buǵan qosa, áıelder úshin olardyń jumys erekshelikterin eskere otyryp, eńbek ótilin esepteýde jeńildikter qarastyrylady. Aıtalyq, zeınetaqy tólemin taǵaıyndaý barysynda áıelderdiń eńbek ótiline bala kútimine baılanysty analardyń jumys istemegen ýaqyty da esepke alynady. Sonymen qatar bala kútimine baılanysty demalystaǵy jumys isteıtin áıelderdiń jınaqtaýshy zeınetaqy júıesine úzdiksiz qatysýyn qamtamasyz etý maqsatynda 2014 jyldan beri respýblıkalyq bıýdjetten mindetti zeınetaqy jarnasyn sýbsıdııalaý júrgiziledi», - dep atap ótedi Úkimet basshysy jaýabynda.
Onyń atap ótýinshe, Memleket basshysynyń tapsyrmasyna sáıkes, osy jyldan bastap bala kútimine beriletin járdemaqy 1,5 jylǵa deıin uzartyldy. Oǵan deıin bala 1 jasqa tolǵanǵa deıin járdemaqy tólenip kelgen edi.
«Jınaqtaýshy zeınetaqy júıesi qoldanysy kezinde áıelder úshin zeınetke shyǵý jasyn ár bala úshin 2 jylǵa qysqartý olardy bolashaqta laıyqty zeınetaqy tólemimen qamtamasyz ete almaıdy. Buǵan qosa, Memleket basshysynyń 2022 jyldyń 1 qyrkúıegindegi «Ádiletti memleket. Birtutas ult. Berekeli qoǵam» atty Qazaqstan halqyna Joldaýyna sáıkes 2023 jyldan bastap áıelderdiń zeınet jasyn arttyrý 2028 jylǵa deıin 61 jas deńgeıinde toqtatyldy. Jalpy, zeınetaqy júıesin jetildirý jumysy jalǵasýda jáne ókiletti organ men Úkimettiń turaqty baqylaýynda», - dedi Álıhan Smaıylov.
