Áıelder úshin zeınet jasyn 58 jasqa deıin tómendetý qajet – Halyq partııasy
2022 jylǵy 4 sáýir 17:40

Áıelder úshin zeınet jasyn 58 jasqa deıin tómendetý qajet – Halyq partııasy

NUR-SULTAN. QazAqparat – Qazaqstan Halyq partııasy elimizdiń Konstıtýtsııasyna 5 túzetý engizý týraly bastama kóterdi. Atalǵan túzetýlerdi búgin Qazaqstan Halyq partııasynyń tóraǵasy Ermuhamet Ertisbaev jarııa etti, dep habarlaıdy QazAqparat tilshisi.

«Birinshiden, jer, onyń qoınaýy men baılyǵy Qazaqstan halqyna tıesili. Biz árbir qazaqstandyqtyń jer men paıdaly qazbalardy ıelenýdiń, odan tabys alýdyń konstıtýtsııalyq quqyǵy úshin jerdiń, jer qoınaýy men baılyǵynyń halyqtyq menshigin bekitýdi usynamyz. Ekinshiden, memleket erler úshin 63 jastan, áıelder úshin 58 jastan bastap zeınetke shyǵýǵa kepildik beredi. Biz negizgi áleýmettik kepildik retinde Konstıtýtsııada azamattardyń zeınetke shyǵý jasyn belgileýdi jáne bul máselede aldaǵy birneshe jylǵa núkte qoıýdy usynamyz. Bul rette áıelder úshin zeınet jasyn arttyrý sheshimin túzetip, ony 58 jasqa deıin tómendetý qajet dep sanaımyz», – dedi partııa tóraǵasy,

Onyń aıtýynsha, úshinshi túzetý– memleket jyl saıyn zeınetaqyny, shákirtaqyny jáne áleýmettik járdemaqyny ótken jylǵy ınflıatsııadan joǵary deńgeıge ındeksteýge mindettenedi.

Osy rette Halyq partııasy zeınetaqyny, shákirtaqyny jáne bıýdjetten tólenetin barlyq áleýmettik tólemderdi jyl saıyn mindetti túrde ınflıatsııa deńgeıine ındeksteý týraly túzetýdi ilgeriletedi.

Bul shyǵystar basym sıpatqa ıe bolýy kerek jáne Úkimettiń sheshimderine táýeldi bolmaýǵa tıis.

Tórtinshi, memlekettik kiristerdi qysqartýdy nemese memlekettik shyǵystardy ulǵaıtýdy kózdeıtin zań jobalaryn engizý kezinde Úkimettiń oń qorytyndysynyń bolýy týraly norma alynyp tastalýy qajet.

«Besinshi – atqarýshy bıliktiń Parlamentke eseptiligin bekitý. Atqarýshy bılikke parlamenttik baqylaýdy kúsheıtý qajet. Mınıstrler depýtattarǵa únemi esep berýi kerek. Esep bekitilmegen jáne senimsizdik bildirilgen jaǵdaıda mınıstrler otstavkaǵa ketýge tıis», – dedi Ermuhamet Ertisbaev.


Seriktester jańalyqtary

Jańalyqtar

Úrdis

MURAǴAT