«Aıbyn» VIII respýblıkalyq áskerı-patrıottyq jastar jıyny aıaqtaldy
2022 jylǵy 25 maýsym 17:53

«Aıbyn» VIII respýblıkalyq áskerı-patrıottyq jastar jıyny aıaqtaldy

NUR-SULTAN. QazAqparat – Qaraǵandy oblysyndaǵy polıgonda balalar jylyna jáne Qazaqstan Qarýly kúshteriniń 30 jyldyǵyna arnalǵan «Aıbyn» respýblıkalyq jıynynyń saltanatty jabylý rásimi ótti, dep habarlaıdy QazAqparat Qorǵanys mınıstrligine silteme jasap.

«Memleket basshysy Qasym-Jomart Kemeluly Toqaevtyń qoldaýymen búginde qazaqstandyq jastarǵa erekshe kóńil bólinip otyr. Jarysqa belsendi túrde qatysyp, áskerı ispen aınalysýdy quptadyńdar. Ózderińniń jetistikterińdi, bilimderiń men daǵdylaryńdy kórsettińder, jańa dostar taptyńdar. Tózimdilik synaldy», – dedi Qorǵanys mınıstriniń orynbasary, general-leıtenant Sultan Kamaletdınov jıynǵa qatysýshylarǵa.

Jıynǵa Nur-Sultan, Almaty jáne Shymkent qalalarynyń, oblystardyń áskerı-patrıottyq klýbtarynyń, Qarýly kúshterdiń, basqa da ásker men áskerı quralymdardynyń áskerı kolledjderiniń, mektep-ınternattarynyń, «Jas ulan» respýblıkalyq mektepteriniń 600-ge jýyq jasóspirimi qatysty. Tartysty, tabandy kúreste barlyq óńirden kelgen ul-qyzdar zııatkerlik jáne shyǵarmashylyq baıqaýlarda, áskerı-qoldanbaly sport túrlerinen ótken jarystarda baǵyn synady.

Olardyń jetistikterine qýanyp, jarystyń aıaqtalýymen quttyqtaýǵa Spasskige Halyq qaharmany, Aýǵan soǵysynyń ardageri general-leıtenant Baqytjan Ertaev, general-maıor Álıhan Jarbolov, kontr-admıral Ratmır Komratov, general-maıor Muqan Dúısekeev, avıatsııa general-maıory Alsaı Jumanov, Qaraǵandy oblysy ákiminiń orynbasary Erbol Áliqulov bardy.

«Sapta turǵan árqaısyń yntamen bilim alyp, úzdiksiz izdenip, ózderińdi damytýmen aınalysatyn bolsańdar, mindetti túrde maqsattaryńa jetetinderińe senemin», – dedi Qorǵanys mınıstriniń orynbasary, general-maıor Muhamedjan Talasov jıynǵa qatysýshylarǵa arnaǵan sózinde.

Sonymen, qorytyndy mynadaı:

UQK Shekara qyzmetiniń «Suńqar» áskerı-patrıottyq klýbynan Darıa Tokareva «Jas sarbaz – jas tilshi», Jetisý oblysynyń «Jetisý tarlandary» áskerı-patrıottyq klýbynan Serikjan Baqtybaı «Úzdik jas sarbaz» atandy.

Nur-Sultan, Almaty, Shymkent qalalary men oblystar arasynda І oryndy Jetisý oblysynyń «Jetisý tarlandary» áskerı-patrıottyq klýby, II oryndy Túrkistan oblysynyń «Arys» áskerı-patrıottyq klýby, III oryndy Aqmola oblysynyń «Jas sarbaz» áskerı-patrıottyq klýby oljalady.

Qarýly kúshter, basqa da ásker men áskerı quralymdar áskerı-patrıottyq klýbtarynyń jarystarynda «Ońtústik» óńirlik qolbasshylyǵy «Bolashaq» áskerı-patrıottyq klýbynyń komandasy jeńiske jetti. ІІ oryndy Qurlyq áskerleriniń «Jas baılanysshy» áskerı-patrıottyq klýby aldy. Áskerı polıtsııa bas basqarmasynyń «Jas ulan» áskerı-patrıottyq klýbyna III oryn buıyrdy.

«Jas ulan» respýblıkalyq mektepteri men oblystyq áskerı mektep-ınternattary arasynda I oryndy Saǵadat Nurmaǵambetov atyndaǵy elordalyq áskerı kolledjdiń komandasy jeńip aldy. II oryndy shymkenttik Sabyr Rahymov atyndaǵy «Jas ulan» respýblıkalyq mektebi, III oryndy Semeıdegi Shoqan Ýálıhanov atyndaǵy «Jas ulan» arnaıy mektep-lıtseı-ınternaty ıelendi.

«Aıbyn» respýblıkalyq jastar jıynynyń bas júldesin Jetisý oblysynan kelgen «Jetisý tarlandary» áskerı-patrıottyq klýby enshiledi.



Uqsas jańalyqtar
Seriktester jańalyqtary

Jańalyqtar

Úrdis

MURAǴAT