Avtokredıt ótinimin búgin tirkep úlgergender 60 kúnniń ishinde kólik alady - Ónerkásipti damytý qory
ASTANA. QazAqparat – 4 paıyzdyq avtonesıege ótinim berýge arnalǵan saıtqa 1 mılııonnan astam adam kirgen, dep habarlaıdy QazAqparat tilshisi.
Bul jaıynda «Ónerkásipti damytý qory» AQ basqarma tóraǵasynyń orynbasary Janar Ibrasheva BAQ ókilderimen ótken brıfıngide aıtty.
«Negizi saıtqa 1 mıllıonnan astam paıdalanýshy kirdi. Onyń ishinde ótinim bergen 125 myńnan astam azamat tirkeldi. Osy platformaǵa elimizdiń barlyq aımaqtarynan ótinishter tústi.
Baǵdarlama iske asyrylǵannan beri osy ýaqytqa deıin jınalǵan qarajat 7,6 mlrd teńge boldy. Revolerlik mehanızm bolǵandyqtan, jalpy 761 adam tirkeledi dep josparlanǵan», - dep túsindirdi Janar Ibrasheva.
Onyń aıtýyna qaraǵanda, osy ótinimder boıynsha nesıe rásimdeý 60 kúnnen aspaýy kerek.
«Nesıemen avtokólik alý jumystary 60 kúnniń ishinde aıaqtalýǵa tıis. Búgin paltformaǵa tirkelgennen keıin ótinish berýshi avtosalonǵa jáne bankke baryp, óz jumystaryn jalǵastyrady. Osy platforma arqyly tirkelgen azamattarǵa 60 kúnniń ishinde avtokólikpen qamtamsyz etý josparlanyp otyr», - dedi ol.
Buǵan deıin «Ónerkásipti damytý qorynyń» baspasóz qyzmeti 4 paıyzdyq avtonesıege ótinim berý nege tym erte toqtatylǵanyn túsindirgen bolatyn.
