Aýyl ákimin saılaý naýqany el ómirindegi mańyzdy oqıǵa bolady - Erlan Qarın
2021 jylǵy 25 maýsym 19:21

Aýyl ákimin saılaý naýqany el ómirindegi mańyzdy oqıǵa bolady - Erlan Qarın

ALMATY. QazAqparat - Aýyl ákimderin tikeleı saılaý búkil el úshin aıtýly oqıǵaǵa aınalady. Mundaı pikirdi Qazaqstan Respýblıkasy Prezıdentiniń kómekshisi, Ulttyq keńestiń hatshysy Erlan Qarın saraptamalyq talqylaýda aıtty, dep habarlaıdy QazAqparat tilshisi.

Onyń aıtýynsha, búginde aýyl ákimderi ákimdik korpýsynyń 90%-dan astamyn quraıdy.

«Qazaqstan halqynyń 40 paıyzdan astamy aýylda turady. Sondyqtan aýyl ákimderin saılaý naýqany mańyzdy oqıǵa bolǵany bir bólek, bul shyn mánisinde azamattar men memlekettiń, bılik pen qoǵamnyń arasyndaǵy qarym-qatynastyń jańa prıntsıpteriniń ornyqqanyn ańǵartady. Oosy reformalar qalaı iske asady? Bolashaqta taǵy qandaı bastamalardy júzege asyra alamyz? Bizdiń maqsatymyz - osy suraqtar aıasynda múmkindiginshe pikir almasý. Búgingi kezdesýde bizdiń áriptesimiz Andreı Chebotarevtiń daıyndaǵan saraptamalyq baıandamasyn tyńdadyq. Bul baıandamada sońǵy eki jylda jarııalanǵan barlyq saıası bastamalar taldanyp júıelengen. Sonymen qatar, Prezıdent tarapynan adam quqyǵy máselesine qatysty birshama mańyzdy máseleler de kóterilgen. Osyndaı kezdesýlerdiń nátıjesinde búgin, mine, osy ýaqytqa deıin taldap qana qoımaı, bolashaqta atqarylatyn basqa da reformalardy pysyqtaý múmkindigi týdy»,- dedi Erlan Qarın.

Aıta keteıik, búgin Almatyda saıası reformalardyń úsh prezıdenttik paketin júzege asyrý boıynsha saraptamalyq talqylaý ótti.

Sharaǵa belgili qazaqstandyq sarapshylar, saıasattanýshylar, QR Parlamenti Májilisiniń depýtattary jáne ulttyq qoǵamdyq senim keńesiniń músheleri qatysty.


Avtor:
Tilshi

Jańalyqtar

MURAǴAT