Australian Open: Tımofeı Skatov qarsylasyna ese jiberdi
2022 jylǵy 18 qańtar 09:19

Australian Open: Tımofeı Skatov qarsylasyna ese jiberdi

NUR-SULTAN. QazAqparat – Qazaqstandyq Tımofeı Skatov Aýstralııa ashyq chempıonatynyń ekinshi aınalymyna shyǵa almady, dep habarlaıdy QazAqparat tilshisi.

Bul dúnıejúzilik reıtıngte 255-orynda turǵan 20 jastaǵy qazaqstandyq tennısshiniń birinshi «Úlken dýlyǵa» týrnıri bolatyn.

Qyzyljar qalasynyń týmasy T.Skatov alǵashqy aınalymda álemniń 117-raketkasy, 31-degi tájirıbeli slovakııalyq Norbert Gomboshpen sheberlik baıqasty.

Birinshi partııada breık jasaǵan N.Gombosh basymdylyq tanytty – 6:3. Ekinishisinde de qarqynyn údete tústi – 6:2.

Degenmen Tımofeı úshinshi sette eki breık jasap, 6:1 esebimen utty.

Tórtinshi partııada qazaqstandyq sportshy breıkpen alǵa ketti – 4:2. Áıtse de qarsylasy tarazy basyn teńestirip qana qoımaı, matchty breıkpen bitirdi – 6:4.

Úsh saǵatqa jýyq ýaqytqa sozylǵan báseke barysynda T.Skatov 7 breık-poınttyń úsheýin paıdalandy. Qarsylasy 5 eıs, 5 breıkke (16 breık-poınt) qol jetkizdi.

Osylaısha erler arasynda jekeleı synda Qazaqstannan Aleksandr Býblık qana qaldy.

N.Gombosh ekinshi aınalymda álemniń 27-raketkasy, US Open týrnıriniń 2014 jylǵy chempıony, horvatııalyq Marın Chılıchpen kortqa shyǵady. Ol bastapqy kezdesýinde ekvadorlyq Emılıo Gomesti 6:3, 6:1, 6:2 esebimen tize búktirdi.

Eske sala keteıik, budan buryn Aleksandr Býblıktiń chempıonatty jeńispen bastaǵanyn jazǵan bolatynbyz.

Sondaı-aq Mıhaıl Kýkýshkın ekinshi aınalymǵa óte almady.


Jańalyqtar

MURAǴAT