Australian Open: qazaqstandyq tennısshilerdiń qarsylastary anyqtaldy

NUR-SULTAN. QazAqparat – Aýstralııa ashyq chempıonatynda erler arasynda qazaqstandyq tennısshilerdiń qarsylastary anyqtaldy, dep habarlaıdy QazAqparat tilshisi.

Qazaqstannyń birinshi, álemniń 35-raketkasy Aleksandr Býblık alǵashqy aınalymda dúnıejúzilik reıtıngte 141-orynda turǵan amerıkalyq Ernesto Eskobedomen sheberlik baıqasady.

Bir qyzyǵy, E.Eskobedony irikteý saıystarynyń fınalynda qazaqstandyq, álemniń 180-raketkasy Mıhaıl Kýkýshkın jeńgen bolatyn.

M.Kýkýshkın negizgi týrnırde álemniń 41-raketkasy, taǵy bir amerıkalyq Tommı Polmen kezdesedi.

«Úlken dýlyǵa» týrnırinde alǵash ret óner kórsetetin, reıtıngte 255-satydaǵy Tımofeı Skatov ózi sııaqty irikteý saıystarynan negizgi dodaǵa qosylǵan álemniń 117-raketkasy, slovakııalyq Norbert Gomboshpen synǵa túsedi.

Taǵy eki qazaqstandyq Andreı Golýbev pen Aleksandr Nedovesov juptyq synda chempıonatqa qatysady.

Aýstralııa ashyq birinshiligi 17 qańtarda bastalady.

Eske sala keteıik, budan buryn Aýstralııa ashyq chempıonatynda Elena Rybakına men Zarına Dııastyń ózara kezdesetinin, Tımofeı Skatovtyń alǵash ret «Úlken dýlyǵa» týrnırinde oınaıtynyn jazǵan bolatynbyz.

Sondaı-aq Anna Danılına Sıdneı týrnıriniń fınalyna shyǵyp, Mıhaıl Kýkýshkın negizgi týrnırge joldama aldy.