Aýǵanstannan 40-tan astam áskerı Ózbekstan shekarasyn buzyp ótken
2021 jylǵy 29 maýsym 14:09

Aýǵanstannan 40-tan astam áskerı Ózbekstan shekarasyn buzyp ótken

TAShKENT. QazAqparat – Eki kúnniń ishinde 40-tan astam aýǵandyq áskerı qyzmetker Ózbekstan eliniń memlekettik shekarasynan zańsyz ótken, dep habarlaıdy QazAqparat tilshisi.

Ózbekstannyń Syrtqy ister mınıstrligi el aýmaǵyna Aýǵan áskerıleriniń shekara buzyp ótýine qatysty málimdeme jasady.

«27 maýsym kúni aýǵan shekara áskeriniń bir top áskerı qyzmetkeri jáne halyq jasaqtarynyń jaýyngerleri, barlyǵy 44 adam Ózbekstannyń Shortep ýezi aýdanyndaǵy memlekettik shekarany buzyp ótti. Budan bir kún buryn, 26 maýsym kúni shekaranyń atalǵan ýchaskesinde Ózbekstan aýmaǵyna kórshiles el kúsh qurylymdarynyń 3 ókiliniń kirip ketý faktisi tirkeldi. Aýǵanstannyń barlyq azamattary eline qaıtaryldy. Ózbek aýmaǵyna zańsyz kirý áreketterine qatań túrde toıtarys beriledi», - delingen málimdemede.

Vedomstvonyń atap ótýinshe, Ózbekstan Aýǵanstanmen dástúrli dostyq jáne tatý kórshilik qatynastardy, beıtaraptylyqty saqtaýdy jáne kórshi eldiń ishki isterine aralaspaýdy qoldaıdy.

Eske sala ketsek, 2021 jyldyń 23 maýsymynda Aýǵanstannyń shekara áskerıleri men jergilikti jasaq jaýyngerleri, barlyǵy 53 adam qarý ustap, Ózbekstan aýmaǵyna ótip ketti.


Jańalyqtar

MURAǴAT