FÝTBOLDAN ÁLEM ChEMPIONATY-2022
  Jańalyqtar  >

Áýe kóligin paıdalanýshylar sany artty – QR IIDM

2022 jylǵy 6 qazan, 16:30
Áýe kóligin paıdalanýshylar sany artty – QR IIDM

ASTANA. QazAqparat – Bıylǵy 8 aıda otandyq áýe kompanııalary tasymaldaǵan jolaýshylar sany 6,9 mln adamdy qurady, dep habarlaıdy QazAqparat.

QR Indýstrııa jáne ınfraqurylymdyq damý mınıstrligi baspasóz qyzmetiniń málimetterine qaraǵanda, ushaqtar ishki jelilerde qańtar-tamyz aılary aralyǵynda 4,9 mln adamdy (2021 jylǵy sáıkes kezeńde – 4,9 mln adam), al halyqaralyq jelilerde 2 mln jolaýshyny (2021 jylǵy sáıkes kezeńde – 1,2 mln adam) tasymaldady.

Máselen, «Air Astana» kompanııasy shamamen 2,7 mln, «FlyArystan» 2,1 mln, al «SCAT» avıakompanııasy 1,8 mln jolaýshy tasymaldaǵan.

Atalǵan kezeńde elimizdiń áýejaılarynda qyzmet kórsetilgen jolaýshylar sany 13,1 mln adamdy qurady. Bul ótken jyldyń sáıkes kezeńimen salystyrǵanda 13 paıyzǵa artyq (2021 jyly – 11,6 mln adam).

Qazirgi ýaqytta ishki avıareısterdi aptasyna 617 reıs jıiligimen 57 baǵyt boıynsha 6 otandyq avıakompanııa oryndaıdy.

Halyqaralyq reıster aptasyna 490 reıs jıiligimen 112 baǵyt boıynsha 28 elde oryndalady. Olardyń qatarynda Túrkııa, BAÁ, Ózbekstan, Grýzııa, Tájikstan, Reseı, Qyrǵyzstan, Belarýs, Germanııa, Egıpet, Ońtústik Koreıa, Nıderlandy, Polsha, Armenııa, Ulybrıtanııa, Maldıv araldary, Taıland, Ázerbaıjan, Katar, Kýveıt, Saýd Arabııasy, Mońǵolııa, Úndistan, Iran, Chernogorııa, Gretsııa, Italııa, Qytaı memleketteri bar.


Seriktester jańalyqtary

Jańalyqtar