Atyraýdan Reseı shekarasyna deıingi jol jóndelip jatyr
2022 jylǵy 24 mamyr 06:16

Atyraýdan Reseı shekarasyna deıingi jol jóndelip jatyr

ATYRAÝ. QazAqparat – Atyraýdan Reseı shekarasyna deıingi joldyń keı bóligine qıyrshyq tas tóselip jatyr, dep habarlaıdy QazAqparat.

Bul joldy qaıta jańǵyrtý jobasy 6 bólikke bólingen. Onyń 833-853 shaqyrymdyq ýchaskesi 2020 jyly paıdalanýǵa berilgen. «Aqtóbe-Atyraý-RF shekarasy (Astrahan)» dálizi boıynsha barlyq jumysty 2023 jyly aıaqtaý josparlanyp otyr.

«Jol aktıvteri sapasy ulttyq ortalyǵy» RMK Atyraý oblystyq fılıalynyń ınjeneri Qýanysh Shortabaevtyń málimetinshe, atalǵan joldyń 100 shaqyrymnan astam bóligine tekserý júrgizilgen. Atalǵan joldyń 648-693 shaqyrymy aralyǵynda «Todını Konstrýktsıon Djeneralı SPA» AQ, al, 693-753 shaqyrymyn «ANT Inshaat Maden Sanaıı A.Sh.» AQ-nyń fılıaly qaıta jańǵyrtý jumystaryn júrgizip jatyr.

«Jaqyn kúnderi joldyń eki bóliginiń 10 shaqyrymyna qara qıyrshyqtas tóseý bastalady. Qazir mundaı tas 1 shaqyrymnan astam jolǵa tóseldi. Budan keıin joldyń betki qabatyna asfalt jáne qıyrshyqtasty mastıkalyq asfaltty beton jabyndysy salynady. Bul joldy jóndeý jumystary turalap qalǵany belgili. Sondyqtan joldyń keıbir bóligine qara qıyrshyqtas tóseý kózdeldi. Joldyń keıbir bólikterinde topyraq tóselip jatyr. Tekseris kezinde aıtarlyqtaı kemshilik anyqtalǵan joq. Biraq, aınalma joldarǵa shań kóterilmes úshin ýaqytyly sý shashyp turý boıynsha eskertý berildi», -deıdi Qýanysh Shortabaev.

Eske sala ketelik, buǵan deıin «Atyraý-Astrhan» avtojoly aıaqtalǵansha, barlyq basshylar qurylys basynda bolatyny habarlanǵan edi.


Avtor:
Tilshi

Jańalyqtar

MURAǴAT