Atyraýda jumys isteıtin sottalýshylardyń salyǵy men zeınetaqy jarnasy aýdarylmaǵan
2022 jylǵy 25 mamyr 07:48

Atyraýda jumys isteıtin sottalýshylardyń salyǵy men zeınetaqy jarnasy aýdarylmaǵan

ATYRAÝ. QazAqparat – Atyraýda jumysqa ornalasqan sottalýshylardyń salyǵy men zeınetaqy jarnasy aýdarylmaǵan, dep habarlaıdy QazAqparat.

Atyraý oblystyq prokýratýrasy sottalǵandardyń quqyqtaryn buzý deregin anyqtady.

Máselen, «Eńbek-Batys» fılıalynda 157 sottalýshynyń tabys salyǵy men mindetti zeınetaqy jarnasy aýdarylmaǵany belgili boldy.

«Atalǵan kemshilikterdi joıý maqsatynda Atyraý oblysy boıynsha memlekettik kirister departamentine prokýrorlyq qadaǵalaý aktisi engizildi. Al, kináli tulǵalar ákimshilik jaýapkershilikke tartyldy», -deıdi oblystyq prokýratýranyń basqarma bastyǵy Nurlan Isaev.

Onyń aıtýynsha, prokýratýranyń bastamasymen ýákiletti organdarmen birlesip, Qurmanǵazy atyndaǵy mádenıet saraıynda probatsııa esebinde turǵan sottalýshylardy jumyspen qamtý maqsatynda bos jumys oryndary jármeńkesi ótkizilgen.

Oǵan 49 sottalýshy qatysyp, 41 adamnyń túıindemesi tapsyrylǵan.

«Bos jumys oryndary jármeńkesine 10 mekeme qatysty. Onyń ishinde «SIChIM Kazahstan», «KKTS», «NDT-Servıs», «Býrkıt Seıftı», «Kazakhstan Petrochemical Industries/ KPI», «Atyraýınjstroı-AIS», «KasHım», «Vest Dala», «Caspian Offshore Construction Realty LLP» jáne «KazPetroTrans» seriktestikteri bar. Sottalǵan adamdy túzeýdiń tıimdi jolynyń biri – olardy turaqty jumysqa ornalastyrý. Sol sebepten, prokýratýra organdary bul máselege únemi kóńil aýdaryp otyr», -deıdi Nurlan Isaev.

Eske sala ketelik, buǵan deıin Atyraý oblysynda jyl basynan beri 4 923 adam turaqty jumysqa ornalasqanyn habarlaǵan edik.


Avtor:
Tilshi

Jańalyqtar

MURAǴAT