Atyraýda jertólede turyp jatqan kópbalaly otbasyna ýaqytsha baspana berildi

2022 jylǵy 4 jeltoqsan, 19:44
Atyraýda jertólede turyp jatqan kópbalaly otbasyna ýaqytsha baspana berildi

ATYRAÝ. QazAqparat – Atyraýda bir jyldan beri jertólede turǵan kópbalaly otbasyna ýaqytsha baspana berildi, dep habarlaıdy QazAqparat tilshisi.

Atyraý qalasy ákiminiń orynbasary Nurjan Ermuhanovtyń aıtýynsha, bes balasy bar otbasy buǵan deıin kópqabatty turǵyn úıdiń jertólesinde turǵan. Endi bul otbasy memleket tarapynan beriletin jańa páterdi alǵanǵa deıin tórt bólmeli jeke úıde tegin turady.

«Baspana jylytý júıesimen, turmystyq tehnıkalar jáne kúndelikti turmysta qoldanylatyn buıymdarmen qamtamasyz etildi. Eń bastysy, balalar úshin keń bólmeler bar», - deıdi Nurjan Ermuhanov.

Bes balaly otbasynyń otaǵasy Samat Ersarıevtiń mamandyǵy – santehnık. Al, onyń zaıyby Altynaı Hamzına «Atyraý Sý Arnasy» KMK-da baqylaýshy bolyp jumys isteıdi.

«Bizdiń jeke úıimiz joq. Sol sebepten, baspana jaldap keldik. Jaldap otyrǵan úıimizden shyǵyp qalyp, bir jyldan astam merzimde jertólede turýǵa májbúr boldyq. Jertóleniń aty – jertóle. Osy kezge deıin kóp qıyndyq kórdik. «Ózimizdiń baspanamyz qashan bolady eken?» dep armandap júrmiz. Qoǵamda qaıyrymdy jandar bar eken. Qıyndyq kórgen kezde qoldaý bildirgen qalalyq ákimdiktegi qyzmetkerlerge jáne janashyr jandarǵa alǵys aıtamyn. Mektep te úıdiń janynda tur. Balalarymyz endi alańsyz uıyqtaıtyn boldy. Eń bastysy, soǵan qýanamyn», - deıdi Altynaı Hamzına.

Eske sala ketelik, buǵan deıin Atyraý munaıshylary asyraýshysynan aıyrylǵan kópbalaly anaǵa páter syılaǵanyn habarlaǵan bolatynbyz.


Uqsas jańalyqtar
Seriktester jańalyqtary

Jańalyqtar