Jańalyqtar  >

Atyraýda jedel járdem kóligi apatqa ushyrady

2022 jylǵy 30 qarasha, 17:05
Atyraýda jedel járdem kóligi apatqa ushyrady

ATYRAÝ. QazAqparat – Atyraýda jol apatynan zardap shekken jedel járdem kóliginiń jolaýshysy aýrýhanaǵa jetkizildi, dep habarlaıdy QazAqparat.

Jol-kólik oqıǵasy búgin, 30 qarashada jergilikti ýaqytpen saǵat 11:00 shamasynda bolǵan.

Oblystyq polıtsııa departamentiniń baspasóz qyzmetinen málim etkendeı, Atyraý qalasyndaǵy L.Vladımırskıı kóshesinde Daewoo Nexia kóliginiń júrgizýshisi ekinshi deńgeıli jolaqtan shyǵyp, basty jolda kele jatqan jedel járdem brıgadasynyń kóligin ótkizbegen. Sóıtip, eki kólik jol ortasynda soqtyǵysqan.

«Jol apatynyń saldarynan jedel járdem brıgadasynyń kóligindegi jolaýshy dene jaraqatyn aldy. Zardap shekken jolaýshy oblystyq aýrýhanaǵa jetkizildi», -dep habarlady departamenttiń baspasóz qyzmeti.

Oblystyq densaýlyq saqtaý basqarmasy baspasóz qyzmetiniń aqparatyna qaraǵanda, jedel járdem kóligi «Medıker Jaıyq Qamqor QP2» JShS-niń óńirlik fılıalyna tıesili eken.

«Bul kólikpen naýqastar tasymaldanbaıdy. Jedel járdem kólik kýrerlik qyzmet atqarýǵa qoldanylady. Jol apaty kezinde kólikte bolǵan kýrer men júrgizýshiniń ómirine tónip turǵan qaýip joq. Olarǵa tıisti medıtsınalyq kómek kórsetilip jatyr. Zardap shekken qyzmetkerlerdiń densaýlyǵy emhana basshysynyń tikeleı baqylaýyna alyndy», -dep málim etti basqarmanyń baspasóz qyzmetinen.

Al, patrýldik polıtsııa qyzmetkerleri jol-kólik oqıǵasyna baılanysty tıisti is-qujattardy jınaqtap jatyr.

Eske sala ketelik, budan buryn Atyraýda jedel járdem kóligi jol apatyna ushyraǵanyn jazǵan bolatynbyz.


Uqsas jańalyqtar
Tegı:
Seriktester jańalyqtary

Jańalyqtar