Atyraýda týrızm salasynda 10,8 mlrd teńgeniń 9 ınvestıtsııalyq jobasy iske asyrylady
2022 jylǵy 2 shilde 01:51

Atyraýda týrızm salasynda 10,8 mlrd teńgeniń 9 ınvestıtsııalyq jobasy iske asyrylady

ATYRAÝ. QazAqparat – Atyraýda týrızm salasynda 10,8 mlrd teńgeniń 9 ınvestıtsııalyq jobasy iske asyrylady, dep habarlaıdy QazAqparat.

Oblystyq kásipkerlik jáne týrızm basqarmasynyń basshysy Nurbol Jańabekovtiń málim etýinshe, bul jobalardy 2025 jylǵa iske asyrý josparlanǵan.

«Atyraý oblysynda 2020 jyly týrızm salasyndaǵy ınvestıtsııa kólemi 20,5 mlrd. teńge bolǵan edi. Al, ótken jylǵy ınvestıtsııa 27,5 mlrd teńgeni qurap, aldyńǵy jylmen salystyrǵanda 34,15%-ǵa artty. Byltyr ishki jáne kirý týrızmi boıynsha 46 myń 200 adamǵa 1 mlrd 675 mln teńgeniń qyzmeti kórsetildi. Oblysta osy salada qyzmet kórsetetin 40-tan astam týrıstik uıymdar men 106 ornalastyrý oryndary bar», -deıdi Nurbol Jańabekov.

Onyń aıtýynsha, 2021-2025 jyldarǵa arnalǵan Atyraý oblysynyń áleýmettik-ekonomıkalyq damýynyń keshendi josparyna sáıkes, 10,8 mlrd teńgeniń 9 ınvestıtsııalyq jobasyn júzege asyrý josparlanyp otyr. Bul jobalarda 338 jumys ornynyń qurylady. Onyń ishinde «Saraıshyq» vızıt ortalyǵynyń qurylysy bıýdjet esebinen qarjylandyrylsa, 8 jobany jeke ınvestıtsııa esebinen iske asyrylyp jatyr.

Qazir 4 joba iske qosylǵan. Bular – «Nurly tal» etnoparki, Qurmanǵazy aýdanyndaǵy eki týrıstik-demalys bazasy men Maqat aýdanyndaǵy ashylǵan kempıng.

«Keshendi jospardaǵy 9 jobaǵa «Nurly-Tal» etnoparki, «Keremet park» attraktsıony men belsendi otbasylyq demalys parki, «Saraıshyq» vızıt-ortalyǵy, «Eldorado» demalys bazasy, Inder aýdanyndaǵy tuzdy kól jaǵalaýyndaǵy shıpajaı-saýyqtyrý kesheni, Qurmanǵazy aýdanynda týrıstik balyq aýlaý bazasy men «Qıǵash» týrıstik bazasyn qaıta jańǵyrtý jobasy, Isataı aýdanyndaǵy Atyraý-Astrahan tas jolyndaǵy «AMANDYQ» kempıngi, Maqat aýdanynda «Aqtóbe-Atyraý» tas joly boıyndaǵy kempıng kiredi», -deıdi oblystyq kásipkerlik jáne týrızm basqarmasynyń basshysy Nurbol Jańabaev.

Mahambet aýdanyndaǵy «Ortaǵasyrlyq Saraıshyq» kesheni Týrıstendirý kartasyna engizilgen. Qazir munda «Saraıshyq» vızıt ortalyǵynyń qurylysy júrgizilip jatyr. Ony osy jyldyń ekinshi jartysynda iske qosý josparlanyp otyr.

Eske sala ketelik, buǵan deıin Atyraýda ár kúni túrli is-shara ótetin etnosaıabaq ashylǵanyn habarlaǵan edik.


Uqsas jańalyqtar

Jańalyqtar

Úrdis

MURAǴAT