Atyraýda turaqtandyrý qory 605 tonna kókónispen qamtyldy

ATYRAÝ. QazAqparat – Atyraýda turaqtandyrý qory 605 tonna kókónispen qamtyldy, dep habarlaıdy QazAqparat.

Óńirlik kommýnıkatsııalar qyzmetiniń málimetinshe, Atyraýda áleýmettik mańyzy bar azyq-túlik taýarlary baǵasynyń ósýin tejeý jáne turaqtandyrý qolǵa alynǵan.

Qazir «Atyraý» áleýmettik-kásipkerlik korporatsııasy» AQ turaqtandyrý qory 605 tonna kókónispen qamtylǵan.

Onyń ishinde 361 tonna kartop, 80 tonna pııaz, 50 tonna sábiz, 114 tonna qyryqqabat bar.

«Bıyl «Felıks» sharýa qojalyǵymen 605 tonna kókónis jetkizýge forvardtyq kelisimshart jasaǵan edik. Soǵan sáıkes jetkizilgen ónim sharýa qojalyǵynyń jeke qoımasynda saqtalady. Al turaqtandyrý qory arqyly satylatyn kókónis baǵasy ótken jylǵy deńgeıde qalady», - deıdi «Atyraý» ÁKK» AQ memlekettik baǵdarlamalardy iske asyrý jáne MJÁ jobalaryn saraptaý departamentiniń basshysy Gúlmıra Meńdiǵalıeva.

Onyń aıtýynsha, bıyl turaqtandyrý qoryna satyp alynǵan ónim kólemi burynǵydan azaıǵan.

«Sońǵy jyldary atyraýlyqtardyń kókónisti tutyný statıstıkasyna, aýyl sharýashylyǵy ónimderin satý deńgeıi taldandy. Sodan baıqaǵanymyz, kókónis tutynýda tapshylyq bolǵan joq. Baǵa turaqtylyǵy saqtaldy. Osyndaı taldaýdan soń turaqtandyrý qoryna 605 tonna ónim jetkilikti bolady degen qorytyndy jasadyq», - deıdi G. Meńdiǵalıeva.

Turaqtandyrý qoryndaǵy kókónister bıylǵy jeltoqsannan bastap 4 iri saýda núktesinde bekitilgen baǵamen satyla bastaıdy.

Eske sala ketelik, budan buryn Atyraýda turaqtandyrý qoryna 605 tonna ónim satyp alynatynyn habarlap edik.