Atyraýda kún raıynyń qolaısyzdyǵynan bir kúnde 24 jol-kólik oqıǵasy tirkeldi
ATYRAÝ. QazAqparat – Atyraý qalasynda aýa raıynyń qolaısyzdyǵynan bir kúnde 24 jol-kólik oqıǵasy tirkeldi. Jol-kólik oqıǵasynan zardap shekken 2 adam aýrýhanaǵa jetkizildi, dep habarlaıdy QazAqparat tilshisi.
Oblystyq polıtsııa departamentiniń baspasóz qyzmetinen málim etkendeı, 7 aqpanda Atyraý qalalyq polıtsııa basqarmasynyń qyzmetkerleri kúsheıtilgen rejım qyzmetine kóshirilgen.
«Jol-kólik oqıǵasyna qardyń kóp jaýǵany, aýa raıynyń qolaısyzdyǵy sebep bolyp otyr. Atyraý qalalyq polıtsııa basqarmasy patrýldik polıtsııa batalonynyń qyzmetkerleri 7 aqpan kúni tańǵy saǵat 7:30-dan keshki saǵat 19:30 aralyǵynda isten shyqqan baǵdarshamdar ornalasqan 24 kósheniń qıylysynda patrýldik jol qozǵalysyn rettedi. Qardyń kóptiginen jolda júre almaı qalǵan jáne kóligi isten shyqqan 80-nen astam júrgizýshige kómek kórsetildi. Aýa raıynyń qolaısyzdyǵynan bul kúni Atyraý qalasynda 24 jol-kólik oqıǵasy tirkeldi. Zardap shekken 2 adam jedel-járdem kómegimen aýrýhanaǵa jetkizildi», -deıdi patrýldik polıtsııa batalonynyń komandıri, polıtsııa kapıtany Dáýren Násıpolla.
Eske sala ketelik, buǵan deıin Atyraý oblysynda eki kún mektep pen kolledjdegi sabaq onlaın formatta ótetinin habarlaǵan bolatynbyz.
Kún raıynyń qolaısyzdyǵynan Atyraýda birneshe shaǵyn aýdan jaryqsyz qaldy.
Al, Atyraýdan Reseı Federatsııasynyń shekarasyna deıingi jol ýaqytsha jabyldy.
«Búgin, 7 aqpanda jergilikti ýaqytpen saǵat 15:00-den bastap qolaısyz aýa raıyna baılanysty «Atyraý – Reseı Federatsııasynyń shekarasy» baǵytyndaǵy tas jol ýaqytsha jabyldy. Atyraý oblysynyń aýmaǵynda qalyń qardyń túsýine baılanysty barlyq jol qozǵalysyna qatysýshyǵa jolda júrý qaýipsizdigin qatań saqtaý qajettigin eskertemiz», -dep habarlady departamenttiń baspasóz qyzmeti.
