Atyraýda kópqabatty 87 úıdiń turǵyndary áli jylýsyz otyr
ATYRAÝ. QazAqparat – Atyraýda shaǵynaýdandaǵy kópqabatty 87 turǵyn úıge jylý áli berilgen joq, dep habarlaıdy QazAqparat tilshisi.
Búgin, 26 jeltoqsanda Atyraý qalasyndaǵy shaǵynaýdanda magıstraldy qubyrdan aqaý tabylyp, jylý berý ýaqytsha toqtatylǵan edi.
Atyraý qalalyq turǵyn úı-kommýnaldyq sharýashylyq bóliminiń basshysy Álibek Muhanbetálıevtiń málimetinshe, jalpy uzyndyǵy 3 045 metr, dıametri 426 mm magıstraldy qubyrdan aqaý tabylǵan.
Sonyń saldarynan búgin jergilikti ýaqytpen saǵat 11:30-da «Nursaıa» shaǵyn aýdanyndaǵy kópqabatty 87 turǵyn úı men №40 mektepke jylý berý toqtatylǵan.
Magıstraldy qubyrdaǵy aqaýdy jóndeýge «Atyraý jylý jelileri» AQ-nyń 15 qyzmetker men 5 tehnıka tartylǵan.
«Qubyr boıyndaǵy aqaýdy tolyq qalpyna keltirý úshin dánekerleý jumysy aıaqtaldy. Endi qubyrdy sýmen toltyrý protsesi bastaldy. Turǵyn úılerge jylý shamamen 1-2 saǵattan soń beriledi», -dep málim etti Atyraý oblysynyń energetıka kesheniniń baspasóz qyzmetinen.
Sınoptıkterdiń deregine qaraǵanda, qazir Atyraýda jaýyn-shashyn joq. Al, aýa temperatýrasy +1 gradýs, jeldiń jyldamdyǵy – sekýndyna 2 metr.
Eske sala ketelik, buǵan deıin Atyraýda 9 kópqabatty turǵyn úı birneshe saǵat jylýsyz qalǵan edi.
Bıylǵy 6 jeltoqsanda dál osy «Nursaıa» shaǵynaýdanynda jylý qazandyǵy isten shyqqan.
Sol sebepten, kópqabatty 9 turǵyn úı turǵyndary birneshe saǵat jylýsyz otyrǵan.
Oblys ákiminiń orynbasary Qaırat Nurtaevtyń aıtýynsha, turǵyn úılerge kommýnaldyq qyzmet kórsetetin mekemeniń basshylyǵy jylý berý úshin dıagnostıka júrgizbegeni anyqtalǵan.
