Atyraýda kópbalaly otbasylarǵa arnalǵan baspana qurylysy eki jyl boıy toqtap tur
2021 jylǵy 2 jeltoqsan 15:53

Atyraýda kópbalaly otbasylarǵa arnalǵan baspana qurylysy eki jyl boıy toqtap tur

NUR-SULTAN. QazAqparat – Atyraýda kópbalaly otbasylarǵa arnalǵan 160 páter eki jyl boıy turalap qaldy. Bul týraly Respýblıkalyq bıýdjettiń atqarylýyn baqylaý jónindegi esep komıtetiniń otyrysynda aıtyldy, dep habarlaıdy QazAqparat tilshisi.

«Qalalyq qurylys bólimi az qamtylǵan kópbalaly otbasylar úshin jalpy quny 1,4 mlrd teńgege 173 páter satyp aldy. Onyń ishinde quny 1,3 mlrd teńge bolatyn 160 páter 21 aıdan astam ýaqyt boıy jergilikti atqarýshy organnyń kezeginde turǵandarǵa bólinbedi», - dedi Esep komıtetiniń múshesi Rashıt Ahmetov Atyraý oblysyna bólingen bıýdjet qarajaty aýdıtiniń qorytyndysynda.

Otyrys barysynda Esep komıtetiniń tóraıymy Natalıa Godýnova bul jaǵdaıdyń sebebin surady.

Anyqtalǵandaı, bar másele páterlerdiń aýmaǵynda bolyp shyqty - bul páterler kópbalaly otbasylarǵa arnalsa da, aýdany 60 sharshy metrden az.

Esep komıtetiniń basshysy muny azamattardy kemsitý dep atady jáne osy máseleni sheship, kinálilerdi jaýapqa tartýdy surady.

Aıta keteıik, Esep komıteti Atyraý oblysyna bólingen bıýdjet qarajatyn paıdalaný tıimdiligine aýdıt júrgizgen. Aýdıt nátıjesinde rásimdik sıpattaǵy 223 buzýshylyq, 5 júıeli kemshilik anyqtalǵan. 22,7 mlrd teńgeni tıimsiz josparlaý, 7,8 mlrd teńgeni tıimsiz paıdalaný, 0,2 mlrd teńge yqtımal shyǵyndar tirkelgen.

Aýdıt qorytyndysy boıynsha Esep komıteti Úkimetke zańnamany jetildirý jónindegi tıisti usynymdar berdi. Atyraý oblysynyń ákimine anyqtalǵan buzýshylyqtar men kemshilikterdi joıý boıynsha shara qabyldaýǵa jáne qoldanystaǵy zańnamany buzýǵa jol bergen laýazymdy tulǵalardyń jaýapkershiligin qaraýǵa tapsyrma berildi.

Ákimshilik isterdi qaraýǵa ýákiletti organdarǵa 40 buzýshylyq faktileri boıynsha materıal jiberilgen.


Jańalyqtar

MURAǴAT