Atyraýda káriz qudyǵyna qulaǵan 11 jasar bala aýrýhanaǵa jetkizildi
2022 jylǵy 21 mamyr 14:24

Atyraýda káriz qudyǵyna qulaǵan 11 jasar bala aýrýhanaǵa jetkizildi

ATYRAÝ. QazAqparat – Atyraýda káriz qudyǵyna qulaǵan 11 jasar bala oblystyq balalar aýrýhanasyna jetkizildi, dep habarlaıdy QazAqparat.

Oqys oqıǵa Atyraý qalasynyń mańyndaǵy Geolog eldi mekeninde keshe, 20 mamyrda bolǵan.

Mektep janyndaǵy káriz qudyǵyna qulaǵan 11 jasar bala túrli jaraqat alǵan. Medıtsınalyq jedel járdem brıgadasy saǵat 12:25-te jaraqaty bar balany oblystyq balalar aýrýhanasyna jetkizgen.

«Aýrýhananyń travmatolog-dárigeri balanyń jaraqatyn tekserdi. Balanyń bas súıegi rentgenge túsirilip, alǵashqy hırýrgııalyq em júrgizildi. Bas súıeginiń samaı bóligi, oń jaq tizesi kógergen. Medıtsınalyq tekserýden, alǵashqy kómek kórsetilgennen keıin bala turǵylyqty meken-jaıy boıynsha ambýlatorlyq baqylaýǵa jiberildi», -dep habarlady oblystyq balalar aýrýhanasynyń baspasóz qyzmeti.

Osyǵan baılanysty «Atyraý oblysy sý arnasy» MKK-nyń mamandary mektep janyndaǵy káriz qudyǵyn jaýyp, onyń aýmaǵyn qorshaǵan.

«Geolog eldi mekeninde káriz qudyǵyn ornatý úshin jumys júrgizilip jatqan edi. Qudyq jabylyp, onyń aýmaǵy qorshaldy. Jumysshylar qudyqtyń syrtyna tógiletin topyraqtyń jetkizilýin kútken edi. Sol mańnan ótip bara jatqan balalar qorshaýdyń artyna júgire jóneldi. Olar toqtaý jónindegi eskertýge jaýap bergen joq. Nátıjesinde olardyń biri qudyqqa túsip ketti», -delingen kásiporyn taratqan aqparatta.

Eske sala ketelik, buǵan deıin Atyraýda jyl basynan beri kúıik shalǵan 6 bala qaıtys bolǵanyn habarlaǵan edik.


Uqsas jańalyqtar
Avtor:
Tilshi

Jańalyqtar

MURAǴAT