Atyraýda esirtki prıtonyn uıymdastyrǵan ózbekstandyq áıel ustaldy
2022 jylǵy 30 maýsym 07:41

Atyraýda esirtki prıtonyn uıymdastyrǵan ózbekstandyq áıel ustaldy

ATYRAÝ. QazAqparat – Atyraýda esirtki prıtonyn uıymdastyrǵan ózbekstandyq áıel ustaldy, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetine qaraǵanda, sheteldik áıel «Qarasora» jedel aldyn alý is-sharasy kezinde anyqtalǵan.

«Polıtsııa departamentine qarasty esirtki qylmysyna qarsy is-qımyl basqarmasynyń qyzmetkerleri «Qarasora» jedel aldyn alý is-sharasy kezinde Atyraý qalasy aýmaǵynda esirtki zattaryn zańsyz saqtaýmen aınalysqan áıeldi ustady. Tergep-tekserý barysynda onyń Ózbekstan Respýblıkasynyń azamattyǵy bar ekenin dáleldendi. 1998 jylǵy sheteldik áıeldiń jaldamaly páterin tintý kezinde untaq tárizdi zaty bar 2 polıetılen paket, ósimdik tektes qaǵaz túıinshek pen sıntetıkalyq esirtkini qoldanýǵa arnalǵan shyny qurylǵylar tabyldy. Aıǵaq retinde tirkeýge alynǵan zattar tárkilendi. Atyraý oblysy boıynsha sot saraptamalary ınstıtýtynyń qyzmetkerleri tárkilengen zattardyń psıhotroptyq zattar @-pvp jáne keptirilgen marıhýana ekeninin anyqtady», - dep málim etti departamenttiń baspasóz qyzmeti.

Qazir bul derekke qatysty QR Qylmystyq kodeksiniń 296- babynyń 4-bóligimen sotqa deıingi tergeý amaldary júrgizilip jatyr.

Al, Qurmanǵazy aýdandyq polıtsııa bóliminiń krımınaldyq polıtsııa bólimshesi men ekstremızmge qarsy is-qımyl tobynyń qyzmetkerleri óz úıiniń aýlasynda esirtki ósirgen turǵyndy anyqtady.

«Tártip saqshylary 1981 jylǵy turǵynnyń meken-jaıyn tekserý kezinde ósirýge tyıym salynǵan, kútip-baptalǵan esirtkige uqsas ósimdikterdi taýyp, tárkiledi. Júrgizilgen saraptama qorytyndysymen 49 túp «sora» ósimdigi ekeni belgili boldy. Qazir atalǵan derek boıynsha QR Qylmystyq kodeksiniń 300-babynyń 1-bóligimen (Ósirýge tyıym salynǵan ósimdikterdi egý nemese ósirý nemese soranyń, kóknárdiń nemese quramynda esirtki zattar bar basqa da ósimdikterdiń suryptaryn egip-ósirý) sotqa deıingi tergep-tekserý bastaldy», -dep málim etti baspasóz qyzmetinen.

Eske sala ketelik, budan buryn Atyraýlyq áıel páterinde júıkege áser etetin dárilerdiń 1 myńǵa jýyq danasyn saqtaǵanyn habarlaǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT