Atyraýda bes jasar egiz qyz 3-qabattan qulap ketken
2022 jylǵy 30 maýsym 14:27

Atyraýda bes jasar egiz qyz 3-qabattan qulap ketken

ATYRAÝ. QazAqparat – Atyraýda bes jasar egiz qyz 3-qabattan qulap ketken. Olar aýyr halde aýrýhananyń jansaqtaý bólimine túsken, dep habarlaıdy QazAqparat.

Oblystyq tótenshe jaǵdaılar departamenti qoǵammen baılanys tobynyń málimetinshe, terezeden qulaǵan egiz qyzdyń páterde qaraýsyz qalǵany anyqtalǵan.

Bul týraly oblystyq polıtsııa departamentiniń jedel kezekshisinen 27 maýsymda túngi saǵat 22:10-da habar túsken. Egizder Atyraý qalasyndaǵy «Nursaıa» shaǵyn aýdanyndaǵy kóp qabatty úıdiń 3-qabatyndaǵy terezeden qulaǵan. Balalar aýyr halde oblystyq balalar aýrýhanasynyń jansaqtaý bólimine jetkizilgen.

«Bıyl balalardyń terezeden qulaýyna baılanysty eki jaǵdaı tirkeldi. Sonyń saldarynan 3 bala túrli dene jaraqatyn aldy, Al, byltyr tirkelgen osyndaı tórt oqys oqıǵadan 3 bala jaraqat alyp, 2 adam qaıtys boldy», -dep habarlady departamenttiń qoǵammen baılanys tobynan.

Qutqarýshylardyń málimetine súıensek, basty sebep – tutqasy ońaı ashylatyn, ári qorǵalmaǵan tereze. Terezedegi moskıt tory táýekeldi arttyrady.

«Balalar moskıt toryna súıenýge bolady dep oılaıdy. Alaıda, moskıt tory balanyń salmaǵyna shydamaıdy. Oqıǵalar hronıkasyna kóbinese 5 jasqa deıingi balalar túsedi. Bul osyndaı oqys oqıǵanyń 80%-yn quraıdy. Balalardyń terezeden qulaý dereginiń jartysy terezeniń janyna jıhazdyń qoıylýymen, eresekterdiń balalardy qorǵaýǵa nemquraıly qaraýymen baılanysty bolyp otyr. Sol sebepten, birneshe qarapaıym erejeni este ustaý qajet. Birinshiden, tereze 12,5 sm-den astamǵa ashylsa, balalardyń terezeden qulap ketýi múmkindigi artady. Ekinshiden, barlyq terezege 12,5 sm-den astam ashýǵa múmkindik bermeıtin taqtaılar nemese qorshaýlar ornatý qajet. Úshinshiden, mehanızmder jabyq tereze rejıminde ǵana emes, jeldetý rejıminde de jumys isteýi qadaǵalanýy tıis. Tórtinshiden, balalardy terezeniń qasynda oınatpaǵan jón. Ótip bara jatqan kólikti, ózge nárselerdi kórsetý úshin olardy terezeniń aldyna otyrǵyzbaý kerek. Besinshiden, terezeniń janyna jıhaz qoımaý jáne moskıt toryna senbeý qajet», -dep málim etti qoǵammen baılanys tobynan.

Eske sala ketelik, budan buryn Atyraýda 2-qabattan qulaǵan eki jasar balanyń jaǵdaı aýyr ekenin habarlaǵan edik.


Jańalyqtar

Úrdis

MURAǴAT