Jańalyqtar  >
  Sport
Atyraýda alǵash ret halyqaralyq shahmat festıvali ótip jatyr
2022 jylǵy 17 tamyz 04:08

Atyraýda alǵash ret halyqaralyq shahmat festıvali ótip jatyr

ATYRAÝ. QazAqparat – Atyraýda alǵash ret «Atyrau Chess Festival» halyqaralyq shahmat festıvali ótip jatyr. Álem chempıony Dınara Sádýaqasovanyń shahmat akademııasy uıymdastyrǵan festıvalge Qazaqstan, AQSh, Nıderlandy, Lıtva, Ýkraına, Ózbekstan, Tájikstan, Belarýs jáne Reseıden kelgen 300-ge jýyq sportshy qatysýda, dep habarlaıdy QazAqparat.

Halyqaralyq shazmat festıvaliniń ashylýyna Atyraý oblysynyń ákimi Serik Shápkenov, Aqparat jáne qoǵamdyq damý mınıstriniń orynbasary Aleksandr Danılov, Sport jáne dene shynyqtyrý isteri komıtetiniń tóraǵasy Samat Erǵalıev qatysty. Sondaı-aq, festıval qonaqtarynyń arasynda Olımpıada chempıony Serik Sápıev bar.

«Atyraýda halyqaralyq shahmat básekesi alǵash ret ótkizilip otyr. Bul – biz úshin úlken mártebe. Mundaı bastamalar óskeleń urpaqty otansúıgishtikke jáne salaýatty ómir salty qundylyqtaryna tárbıeleý úderisine oń áserin tıgizedi», -dedi Atyraý oblysynyń ákimi Serik Shápkenov.

Ákimniń málimetinshe, óńirde 1984 jyly sport mektepterinde shahmat úıirmesi ashylǵan. Qazir oblysta shahmat sportymen 18 355 adam aınalysady. Onyń ishin aýyldarda úıirmelerge 11 330 adam barady.

Festıvalge kásibı sportshylar men halyqaralyq grossmeısterlerden bólek, Dınara Sádýaqasovanyń shahmat akademııasynan 58 tárbıelenýshisi qatysýda. Máselen, 6 jasqa deıingi kategorııada oblys chempıony Álı Saparov eki jyldan astam ýaqyt akademııada bilim alǵan. Ol endi alǵash ret halyqaralyq saıysta baq synaýǵa bekingen.

Taǵy bir qatysýshy Nurpeıis Úmbetqalıdyń jasy – 13-te. Shahmat akademııasynyń tájirıbeli jattyqtyrýshylardan dáris alǵan ol respýblıkalyq jarysta jeńiske jetken. Endi ol da birinshi ret halyqaralyq shahmat jarysyna qatysyp otyr.

Eske sala ketelik, buǵan deıin QR Prezıdenti halyqaralyq shahmat festıvaline qatysýshylarǵa quttyqtaý joldaǵanyn jazǵan edik.



Uqsas jańalyqtar
Seriktester jańalyqtary

Jańalyqtar

Úrdis

MURAǴAT