Atyraýda 6 mln teńgeni jymqyrǵan mektep dırektory sottaldy
2022 jylǵy 25 qańtar 04:40

Atyraýda 6 mln teńgeni jymqyrǵan mektep dırektory sottaldy

ATYRAÝ. QazAqparat – Atyraýda 6 mln teńgeni jymqyrǵan mektep dırektory 3,6 jylǵa sottaldy, dep habarlaıdy QazAqparat.

Oblystyq sottyń baspasóz qyzmetinen málim etkendeı, mektep dırektory memlekettik fýnktsııalardy oryndaýǵa ýákilettik berilgen adamǵa teńestirilgen adam bola tura, paıdakúnemdik nıetpen, aýyr saldarǵa ákep soqqan jáne resmı qujattarǵa kórineý jalǵan málimet engizý arqyly qyzmettik jalǵandyq jasaǵany úshin aıyptalǵan. Qylmystyq is Atyraý qalalyq №2 sotynda qaraldy.

«M.Bekmuhambetov atyndaǵy orta mektep» KMK dırektory A.Salıhova 2018 jylǵy qyrkúıek pen 2021 jylǵy shilde aılary aralyǵynda qyzmetten bosaǵan jáne jumys jasap júrgen múǵalimderge tabel toltyrý, buıryq shyǵarý arqyly Qazaqstan Respýblıkasy zańnamalarynda belgilengen tártippen jáne kýálandyrylǵan resmı qujattarǵa jalǵan málimetter engizip, bıýdjet qarajattarynyń negizsiz eseptelýine jol bergen. Sottalýshynyń is-áreketinen azamattardyń quqyqtary men zańdy múddeleri jáne mekteptiń qalypty jumysy buzylyp, 6 099 904 teńge kóleminde memlekettiń zańmen qorǵalǵan múddesine eleýli túrde zııan kelip, aýyr saldarǵa ákelip soqtyrǵan. Sottalýshynyń kinási sot otyrysynda sottalýshymen daýlanbaǵan, sotqa deıingi tergep-tekserý barysyndaǵy jábirlenýshilerdiń, kýálardyń jaýaptarymen, saraptama, maman, aýdıt qorytyndylarymen tolyqtaı dáleldendi», -dep habarlady sottyń baspaóz qyzmeti.

Basty sot talqylaýy kezinde sottalýshy men qorǵaýshy tarapynan protsestik kelisim jasaý týraly ótinishhat berilip, prokýrormen protsestik kelisim jasalǵan. Prokýror sottalýshyǵa memlekettik qyzmette jáne memlekettik uıymdarda laýazymdardy atqarý quqyǵynan ómir boıyna aıyra otyryp, 3 jyl 6 aı merzimge bas bostandyǵynan shekteý jazasyn taǵaıyndaýdy suraǵan.

«Aıyptaý aktisi men protsestik kelisimde jaýaptylyq pen jazany aýyrlatatyn mán-jaılar tanylmaǵan, al jeńildetetin mán-jaılar retinde sottalýshynyń jas balasynyń bolýy, kinásin tolyq moıyndaýy jáne qylmystyq quqyq buzýshylyq saldarynan keltirilgen múliktik zalaldy erikti túrde tolyq ótegeni tanylǵan. Osyǵan baılanysty sot sottalýshyǵa protsestik kelisimge saı, memlekettik qyzmette jáne memlekettik uıymdarda laýazymdardy atqarý quqyǵynan ómir boıyna aıyra otyryp, 3 jyl 6 aı merzimge bas bostandyǵyn shekteý jazasyn taǵaıyndady. Іs boıynsha azamattyq talap qoıylmaǵan, keltirilgen 6 099 904 teńge zalal sotqa deıin tolyq ótelgen», -dep málim etti oblystyq sottyń baspasóz qyzmeti.

Sot úkimi zańdy kúshine engen joq.

Eske sala ketelik, budan buryn Atyraýda zańsyz mıtıngke qatysty qatysqan 11 adamnyń jazasy jeńildegenin habarlaǵan bolatynbyz.


Avtor:
Tilshi

Jańalyqtar

MURAǴAT