FÝTBOLDAN ÁLEM ChEMPIONATY-2022

Atyraýda 20-ǵa jýyq adamnyń 3 mln teńgesin jymqyrǵan alaıaq ustaldy

2022 jylǵy 28 qyrkúıek, 13:25
Atyraýda 20-ǵa jýyq adamnyń 3 mln teńgesin jymqyrǵan alaıaq ustaldy

ATYRAÝ. QazAqparat – Atyraýda 20-ǵa jýyq adamnyń 3 mln teńgesin jymqyrǵan alaıaq ustaldy. Kúdikti olarǵa jalaqysy joǵary jumysqa ornalastyryp berýdi ýáde etken, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, 32 jastaǵy turǵyn bıylǵy naýryzdan beri 20-ǵa jýyq adamdy aldaǵan.

«Alaıaq qylmysty basqa adamnyń senimine kirý, aldaý arqyly onyń múlkin, aqshasyn jymqyrý, ne ıelený arqyly jasaıdy. Olar ańǵal adamdardyń qyzyǵýshylyǵyn týdyryp, jeńil paıda tabý, bir nársege ońaı ári tez qol jetkizý sııaqty qasıetterine baǵyttaıdy. Ásirese, jumyssyz júrgen qarapaıym turǵyndardy qyrýar shyǵynǵa batyryp ketedi. Osyndaı ońaı oljany kásip qylǵan atyraýlyq 32 jastaǵy alaıaq ustaldy. Kúdikti adamdardyń senimine kirip, jalaqysy joǵary jumysqa ornalastyryp berýdi ýáde etken. Sóıtip, bıylǵy naýryz aıynan beri 20-ǵa jýyq adamdy arbaýyna túsirip, 3 mln teńgesin jymqyrǵan», - dep habarlady departamenttiń baspasóz qyzmeti.

Qazir ustalǵan kúdiktige qatysty QR Qylmystyq kodeksi 190-babynyń 3-bólimimen sotqa deıingi tergeý amaldary júrgizilip jatyr.

«Polıtsııa qyzmetkerleri turǵyndardan osyndaı alaıaqtyq qylmystyń qurbany bolmaýy úshin saq bolýdy eskertedi. Kúdikti usynystar bolsa, polıtsııaǵa habar berý suralady», - dep málim etti departamenttiń baspasóz qyzmetinen.

Eske sala ketelik, budan buryn alaıaq Atyraý oblysynda ákim atynan habarlama taratqanyn jazǵan bolatynbyz.


Uqsas jańalyqtar
Seriktester jańalyqtary

Jańalyqtar