Atyraýda 100-ge jýyq sottalýshy raqymshylyq aıasynda bostandyqqa shyqty
2022 jylǵy 1 shilde 22:48

Atyraýda 100-ge jýyq sottalýshy raqymshylyq aıasynda bostandyqqa shyqty

ATYRAÝ. QazAqparat – Atyraýda jyl basynan beri 100-ge jýyq sottalýshyǵa raqymshylyq jasaldy, dep habarlaıdy QazAqparat.

Atyraý oblysy boıynsha Qylmystyq atqarý júıesi departamenti arnaıy esep tobynyń aǵa ınspektory Botagóz Іztileýovanyń málimetine súıensek, Prezıdenttiń Qazaqstan Respýblıkasy Táýelsizdiginiń 30 jyldyǵyna baılanysty sottalǵandarǵa raqymshylyq jasaý týraly jarlyǵyna sáıkes túzeý mekemesinen 27 sottalýshy, probatsııa qyzmetiniń esebindegi 70 adam bosatylǵan.

Al, túzeý mekemelerindegi 44 sottalýshy men probatsııa qyzmetiniń esebindegi 155 adamnyń jaza merzimi qysqartylyp otyr.

«Biz ótken jyly jeltoqsan aıynda prokýratýra, sot jáne sotqa deıingi tergeý organdarynyń ókilderimen Prezıdent jarlyǵyn iske asyrý boıynsha birlesken keńes ótkizdik. Jarlyq qoldanysqa engizilgen sátte raqymshylyqqa jatatyn adamdardyń tizimin túpkilikti aıqyndaý turǵysynan jeke isterdi muqııat zerdeledik. Ár sottalýshy týraly materıaldardy kezeń-kezeńimen sotqa jiberdik. Arnaıy jarlyq aıasynda raqymshylyq jasaýǵa jatatyn sottalǵandardyń sany 325 boldy. Raqymshylyq jasaýǵa onsha aýyr emes qylmys jasaǵan adamdar, zalal keltirýge ákep soqpaǵan aýyrlyǵy ortasha qylmys jasaǵan ne ony tolyq ótegender, sottalýshylarǵa azamattyq talap qoıylmaǵandar, zalaldyń nemese azamattyq talaptyń bolýyna qaramastan aýyrlyǵy ortasha qylmys jasaǵan áleýmettik jaǵynan osal adamdar, ata-ana quqyqtarynan aıyrylmaǵan jáne kámeletke tolmaǵan balalardyń jalǵyz ata-anasy, birinshi nemese ekinshi toptaǵy múgedekter jatady», -deıdi Botagóz Іztileýova.

Onyń aıtýynsha, raqymshylyq týraly jarlyqqa sáıkes bosatylǵan adamdarǵa arnaýly áleýmettik qyzmet kórsetý máselesi boıynsha jergilikti atqarýshy organdar men konsýltatıvtik-keńesshi organnyń kezekten tys otyrysy ótkizilgen.

Eske sala ketelik, Atyraýda jumys isteıtin sottalýshylardyń salyǵy men zeınetaqy jarnasy aýdarylmaǵanyn jazǵan bolatynbyz.


Foto: ktrk.kg
Seriktester jańalyqtary

Jańalyqtar

Úrdis

MURAǴAT