Atyraý turǵyny qymbat kólikterdi jalǵa alyp, keıin satyp otyrǵan
2022 jylǵy 25 mamyr 23:35

Atyraý turǵyny qymbat kólikterdi jalǵa alyp, keıin satyp otyrǵan

ATYRAÝ. QazAqparat – Atyraý turǵyny birneshe qymbat kólikti jalǵa alyp, keıin satyp jibergen, dep habarlaıdy QazAqparat.

Oblystyq Polıtsııa departamentiniń baspasóz qyzmetinen málim etkendeı, osy derekke baılanysty 29 jastaǵy jigit ustalǵan.

«Atyraý qalasynda turatyn 1993 jyly týǵan azamat 2020 jyldyń qańtarynan beri birneshe adamnan kelisimshart negizinde avtokólikterdi arendaǵa alǵan. Keıin jalǵa alǵan qymbat avtokólikterdi satyp jibergen.

Qazir 29 jastaǵy jigit alaıaqtyq jasady degen kúdikpen ustaldy. Atalǵan derekke qatysty Atyraý qalalyq polıtsııa basqarmasy QR Qylmystyq kodeksiniń 190-baby 4-bóligimen sotqa deıingi tergep-tekserý amaldaryn bastady», - dep habarlady departamenttiń baspasóz qyzmetinen.

Belgili bolǵandaı, kúdiktige qatysty 13 qylmystyq is tergelip jatyr. Bastapqyda jábirlenýshilerdiń 13 kóligi tabylǵan. Polıtsııa qyzmetkerleri keıin taǵy eki kólikti anyqtaı aldy.

«Qazir kúdikti S.M.-niń is-áreketinen zardap shekken adamdardy izdestirip jatyrmyz. Jábirlenýshilerden Atyraý oblystyq Polıtsııa departamentiniń tergeý basqarmasyna nemese 102 telefonyna habarlasýdy suraımyz», - dedi vedomstvodan.

Eske sala ketelik, buǵan deıin Atyraýda VIP nómir alýshylar jalǵan túbirtek qoldanyp, 5 mln teńge tólemegen habarlaǵan bolatynbyz.


Avtor:
Tilshi

Jańalyqtar

MURAǴAT