Atyraý oblysynyń úsh aýdanynda jaryq sóngen
ATYRAÝ. QazAqparat – Atyraý oblysynyń úsh aýdanynda da jaryq sóngen, dep habarlaıdy QazAqparat.
«Atyraý-Jaryq» AQ-nyń birinshi vıtse-prezıdenti Qýat Sısenǵalıevtyń málimetinshe, munaıly shahardaǵy 8 shaǵyn aýdanda jaryq sónip qalǵan. Sondaı-aq, Jylyoı, Mahambet, Qurmanǵazy aýdandarynda elektr energııasynyń sóngeni anyqtalǵan.
«Atyraý oblysynda 7 aqpanda jergilikti ýaqytpen tańǵy saǵat 7:30 shamasynda aýa aıynyń qubylýy bastady. Qatty jel soǵyp, qar jaýdy. Bul Atyraý qalasyndaǵy birneshe shaǵyn aýdan men shaharǵa irgeles ornalasqan Atyraý, Aqsaı, Damby sekildi eldimekenderde elektr energııasy óship qalýyna ákelip soqtyrdy. Buǵan transformatorly pýnktterdiń ızolıatsııasyna qar jabysyp, relelik qorǵanysh avtomatıkasynda aýytqý boldy. Ony ár transformatorlyq pýnktten aıyryp, bir-birden qosyp, tok kózin berip jatyrmyz. Qazir Damby, Jumysker, Erkinqala eldimekenderine jaryq berildi. Jóndeý jumystary jalǵastyrylady», -dep habarlady Qýat Sısenǵalıev.
Onyń aıtýynsha, elektr jelisindegi aqaýdy qalpyna keltirýge 15 avarııalyq brıgada, onyń ústine 5 jedel brıgada tartylǵan. Transformatorly pýnktterdegi elektr jelisin jóndeýshiler 2 gıdravlıkalyq kótergish (AGP), jerdi burǵylaý arqyly qazatyn arnaıy 2 tehnıkalarymen qamtylǵan.
«Úsh aýdan men Atyraý qalasyndaǵy shaǵyn aýdandarǵa jóndeý jumystary jergilikti ýaqytpen saǵat 20:00-ge deıin aıaqtaý kózdelip otyr. Sonan tutynýshylarǵa elektr energııasy beriledi», -dep málim etti Qýat Sısenǵalıev.
Eske sala ketelik, budan buryn Atyraýda kún raıynyń qolaısyzdyǵynan birneshe shaǵyn aýdan jaryqsyz qalǵanyn jazǵan edik.
